५० हजार कार्यकर्ता काठमाडौंको सडकमा उतार्दै प्रचण्ड-माधव समूह

१४ पुष,काठमाडौं – संसद विघटनविरुद्व नेपाल कम्युनिष्ट पार्टी (नेकपा) को प्रचण्ड माधव पक्षले आज सरकारविरुद्व काठमाडौंमा प्रदर्शन गर्ने भएको छ ।

प्रचण्ड-माधव समूहले आज अन्य जिल्लाहरुबाट गरेर ५० हजार कार्यकर्ता काठमाडौं उतार्दै छ ।

प्रदर्शनमा अध्यक्षद्वय पुष्पकमल दाहाल प्रचण्ड र माधवकुमार नेपाललगायत शीर्ष नेताहरू प्रदर्शनमा सहभागी हुँदैछन्।

सिन्धुली, दोलखा, रामेछाप, सिन्धुपाल्चोक, काभ्रे, भक्तपुरका कार्यकर्ता बानेश्वर चोकमा भेला भएर प्रदर्शन सुरू गर्ने कार्यक्रम तय भएको छ। मकवानपुर, धादिङका कार्यकर्ता कुलेश्वर टेकुबाट, नुवाकोट र रसुवाका कार्यकर्ता लैनचौर, ललितपुरका कुपनडोलमा ११ बजे भेला भएर प्रदर्शन गर्ने बुझिएको छ ।

सडक प्रदर्शन गर्दै उनीहरू भृकुटीमण्डपसम्म पुग्नेछन्। त्यहाँ शीर्ष नेताहरूले सम्बोधन गर्ने कार्यक्रम छ। काठमाडौंका टेकुचोक, लैनचौर, नक्साल, घण्टाघर, रत्नपार्क र बागबजार क्षेत्रबाट पनि प्रदर्शन हुने नेकपा केन्द्रीय समितिले जनाएको छ।