वरिष्ठ गायक जगतमर्दन थापाको निधन

२२ मंसिर,काठमाडौं – वरिष्ठ गायक जगतमर्दन थापाको निधन भएको छ ।

८५ वर्षीय थापाको आज सोमबार बिहान १० बजे थापाथलीस्थित नर्भिक अस्पतालमा उपचारको क्रममा उनको निधन भएको उनको पारिवारिक श्रोतले जनाएको छ ।

उनका छोरा मोहितमर्दनले उनको निधनको पुष्टि समेत गरेका छन् । कोरोना संक्रमण भएर मुक्त भएका उनी छातीको समस्याका कारण अस्पतालमा उपचारत थिए । वि.सं. २०१३ सालबाट नै रेडियो नेपालबाट सांगीतिक तथा साहित्यिक यात्रा सुरु गरेका उनले २०१८ सालमा कोलकाताबाट हिज मास्टर्स भ्वाइसमा ‘माया लुकाई लुक्दैन’ बोलको पहिलो गीत रेकर्ड गराएका थिए ।

सञ्चय कोष, कृषि चुन उद्योग जस्ता सरकारी निकायमा रहेर काम गरेका उनको ‘मनको शान्ति’, ‘माया लुकाई लुक्दैन’, ‘म पतझड तिमी मधुमास’ लगायतका एल्बम आएका छन् । बृद्ध अवस्थामा सम्म पनि संगीत अध्यायलाई निरन्तरता दिएका उनले ७३ वर्षमा भारतको इलाहावाद संगीत विश्वविद्यालयबाट प्रथम श्रेणीमा ‘बी म्युज’ उत्तीर्ण गरेका थिए । थापाको निधनप्रति बिभिन्न कलाकर्मीलगायतले दुःख व्यक्त गरेका छन् ।

मृतक थापाका एक छोरा र तीन छोरी रहेका छन् । उनको आजै पशुपति आर्यघाटमा अन्तिम संस्कार गरिने बताइएको छ ।