शुभयुग संवाददाताप्रकाशित मिति: २०७७ मंसिर २१, आईतबार (३ साल अघि)
४५७ पाठक संख्या
२१ मंसिर,काठमाडौं – रुपन्देहिको बुटवलमा खाग तस्करले प्रहरीको पेस्तोल खोसेर गोली चलाएको छ ।
आइतबार बिहान बुटवल उपमहानरगरपालिकास्थित चौराह र मिलनचोकको बीचमा रहेको कलश होटलमा तस्करले चलाएको गोली लागेर एकजना घाइते भएको जिल्ला प्रहरी कार्यालय रुपन्देहीले जनाएको छ । प्रहरीका अनुसार तस्करको गोली लागेका घाइतेको पहिचान भइसकेको छैन ।
घाइतेको लुम्बिनी प्रादेशिक अस्पताल बुटवलमा उपचार भइरहेको इलाका प्रहरी कार्यालय बुटवलका प्रहरी नायब उपरीक्षक प्रतित सिंह राठौरले जानकारी दिए । राठौरका अनुसार घाइतेको चिउँडोमा गोली लागेको छ । यद्धपी उक्त घाईते तस्कर समुहकै ब्यक्ती भएको खुल्न आएको छ ।
‘तस्करले चलाएको गोली लागेर तस्कर समूहकै एकजना घाइते भएको हो,’ डीएसपी राठौरले भने, ‘पेस्तोल खोसिएका प्रहरी भने सकुशल रहेका छन् ।’ प्रहरीले होटलबाट दुई जनालाई नियन्त्रणमा लिएको छ भने एकजना फरार छन् । होटलमा बसेकाहरूले खाग तस्करी गरेको सुराकीको आधारमा प्रहरी टोली होटलमा पुगेको थियो ।
प्रहरी आएको सूचना पाउनेबित्तिकै तस्करले प्रहरीकै पेस्तोल खोसेर गोली चलाएको समेत डीएसपी राठौरले बताए ।
