२ फागुन, चितवन- सडक दुर्घटनामा परी निधन भएकी नायिका महिमा सिलवालको देवघाटमा अन्त्येष्टि गरिएको छ ।
बुधवार साँझ पृथ्वी राजमार्ग अन्र्तगत् धादिङको गजुरी गाउँपालिका–२ चाम्बासमा बसको ठक्करबाट निधने भएकी कलाकार सिलवालको बिहिवार हिन्दु परम्परा अनुसार देवघाटमा अन्त्येष्टि गरिएको पारिवारिक श्रोतले जानकारी दिएको छ ।
भरतपुर महानगरपालिका–१३ गीतानगर निवासी सिलवालको भैरहवाबाट काठमाडौँतर्फ आउँदै गरेको लु२ख १३५ नंको बसको ठक्करबाट निधन भएको हो । बसले सिलवाल सवार बा ९८ प ७०५८ नंको स्कुटरलाई ठक्कर दिएको थियो । दुर्घटनामा महिमाकी दिदी २८ वर्षीया शर्मिला सिलवालको समेत निधन भएको थियो ।
दुर्घटनामा गम्भीर घाइते भएपछि उपचारका लागि प्राथमिक स्वास्थ्य केन्द्र गजुरी पठाइएकोमा घाइते महिमा सिलवालको उपचारको क्रममा मृत्यु भएको हो भने घाइते शर्मिला सिलवालको काठमाडौँस्थित ट्रमा सेन्टरमा उपचारका क्रममा मृत्यु भएको थियो ।
बहिनीको ‘इन्गेजमेन्ट’का लागि चितवन आउँदै गरेको बेला दुर्घटना भएको थियो ।
