बृहत् निःशुल्क शल्यक्रिया स्वास्थ्य शिविरमा सेवाग्राहीको भिड

धनकुटा । पहुँच नहुनेहरुका लागि स्वास्थ्य सेवा मुलनाराका साथ बृहत् निःशुल्क शल्यक्रिया स्वास्थ्य शिविर धनकुटामा सञ्चालन भैरहेको छ । कार्तिक ५ गतेदेखि १७ गतेसम्म सञ्चालन हुने सो शिविरमा ७ गतेबाट शल्यक्रिया शुरु गरिएको छ । सो शिविरमा पहिलो दिन र आज गरी दुई दिनमा झण्डै तीन सय विरामीहरुले उपचार सेवा पाएका स्वास्थ्य शिविरका संयोजक रोशेष श्रेष्ठले जानकारी दिए ।

जिल्ला अस्पतालमा सञ्चालित स्वास्थ्य शिविर अलोहा हवाई मिसन अन्तर्गत अमेरिकी ४० जनाको विशेषज्ञ डाक्टरहरुको टोलीले सेवा दिईरहेको छ । शिविरमा शरीरका गाँठागुठी, हर्निया, हाइड्रोशिल, मुत्रथैलीको मुत्रनलीको पत्थरी, पित्तथैलीको पत्थरी, पायल्स, पाठेघर झरेको, पाठेघरमा मासु पलाएकोलगायतको शल्यक्रिया गरिएको संयोजक रोशेष श्रेष्ठले जानकारी दिए । श्रेष्ठकाअनुसार शिविरमा कृतिम हात लगाउने र दाँत सम्बन्धी उपचार समेत गरिने जानकारी दिए ।

शिविरमा पायल्स, पथरी, गाईनो, हर्निया, किसाईनस, लाईकोमा, जेनेरल तथा माइनर शल्यक्रिया गरिएका छन् । शिविरमा दन्तसम्बन्धि र हाथ नभएकालाई कृतिम हाथसमेत वितरण गरिएको छ । मेजर अन्तर्गत २४ जना र माईनर अन्तर्गत ४४ जनाको शल्यक्रिया गरिसकेको प्रचारप्रसार समितिका संयोजक राजेश्वरबहादुर श्रेष्ठले जानकारी दिए । श्रेष्ठकाअनुसार दन्तसम्बन्धि उपचार दुईसय ५ जना तथा एक जनालाई कृतिम हात गरिएको छ ।

सो शिविरमा एक पटकमा ४ जनाको मेजर अप्रेशन गर्ने व्यवस्था गरिएको स्वयम्सेवक परिचालन तथा सचिवालय समितिका संयोजक विजयसन्तोषी राईले जानकारी दिए । राईकाअनुसार शिविरमा धनकुटा सहित तेह्रथुम, भोजपुर, संखुवासभा, सुनसरी, मोरङ, सिरहालगायतका जिल्लाहरुका विरामीहरुले सेवा लिन आएका छन् । नेपालीहरुको महान पर्व दशैंको कारण पहिलो विरामीको चाप केहि कम भएपनि दोस्रो दिन चाप बढेको जानकारी दिए ।

सो शिविरको एक कार्यक्रमका वीच प्रतिनिधिसभाका सदस्य राजेन्द्रकुमार राईले रिवन काटेर उदेघाटन गरेका थिए । सो अवसरमा सांसद राईले नेपाल सरकारले जनताको स्वास्थ्य उपचार सबै जिल्लामा गुणस्तरीय र सहज रुपमा गर्ने व्यवस्था मिलाउन लागि परेको बताए । उनले अहिले जिल्ला जिल्लामा सरकारले स्वास्थ्य सेवा दिन नसकिरहेको अवस्थामा अमेरिकी विशेषज्ञ धनकुटा आएर सेवा दिनलागेकोमा धन्यवाद दिए ।

यस्तै सो अवसरमा अमेरिकी चिकित्सक टोलीको प्रमुख विकास गुप्ताले पहिले ४ पटक धनकुटामा सफलतापूर्वक शिविर सञ्चालन गरिसकेको जानकारी दिदै यो पटक पनि आमधनकुटेली जनताको अपार माया, सद्भाव, स्नेह र सहयोगले सफल हुने विश्वास रहेको बताए । उनले शिविर अमेरिकी जनतासँग चन्दा उठाएर सञ्चालन गरेको जानकारी दिदै स्थानीय आयोजक समितिलाई कुनैपनि प्रकारको भत्ता र सुविधाको व्यवस्था नरहेको जानकारी दिए ।

सचिवालय समितिका संयोजक विजयसन्तोषी राईले सञ्चालन गरेको उद्घाटन कार्यक्रमको समापन आयोजक समितिको संयोजक रोशेष श्रेष्ठले गरेका थिए ।