चलचित्र ‘ऊनको स्वीटर’ मार्फत पूर्वी नेपालको सौन्दर्य र जातीय सद्भाव दर्शाउने प्रयास

काठमाडौं – नेपाली चलचित्र ‘ऊनको स्वीटर’ मार्फत पूर्वी नेपालको प्राकृतिक सौन्दर्य, सांस्कृतिक विविधता, जातीय सम्बन्ध र ग्रामीण परिवेशलाई पर्दामा उतारिएको छ। हालै सार्वजनिक गरिएको ट्रेलरमार्फत् चलचित्रका मुख्य कलाकार तथा निर्माता–निर्देशकहरूले यस फिल्मको सार र सन्देशबारे जानकारी दिएका छन्।

चलचित्रका प्रमुख अभिनेता विपिन कार्कीका अनुसार ‘ऊनको स्वीटर’ दुई दशक अगाडिको ग्रामीण समाजमा आधारित कथामा निर्माण गरिएको छ। उनले बताएअनुसार चलचित्रमा ‘गुरुङसेनी’ युवती र ‘काफ्ले ब्राह्मण’ युवकबीचको प्रेम सम्बन्धमा जातीय अन्तर्विरोध कसरी देखा पर्छ भन्ने विषय मार्मिक ढंगले प्रस्तुत गरिएको छ।

“गीतसंगीत झैँ सरल र सहज कथा बोकेको यो चलचित्रले दर्शकलाई त्यसबेलाको ग्रामीण जीवनशैली र समाजसँग जोड्नेछ,” अभिनेता कार्कीले भने, “यो चलचित्रले दर्शकलाई महसुस गराउने, अनुभूति दिलाउने खालको बनेको छ।”

चलचित्रका निर्देशक नवीन चौहानले फिल्ममार्फत आफूले कल्पना गरेको कथावस्तुलाई पर्दामा उतार्न खोजेको बताए। “मैले सोचेको संसार, पात्र र परिवेशलाई जीवन्त रूपमा प्रस्तुत गरेको छु। गीतसंगीतको माध्यमबाट कथा भन्ने शैली प्रयोग गरिएको छ,” उनले भने।

चलचित्र ‘ऊनको स्वीटर’ को छायांकन पूर्वी नेपालको पाँचथर जिल्लामा गरिएको हो। पाँचथरको हरियाली, ग्रामीण जीवनशैली र जातीय विविधताले भरिएको परिवेश चलचित्रको मुख्य पृष्ठभूमि बनेको छ।

चलचित्रमा विपिन कार्कीका साथै मिरुना मगर, परीक्षा लिम्बू, विल्सनविक्रम राई, सुनिल पोखरेल, माओत्से गुरुङ, प्रेम सुब्बालगायतका कलाकारको अभिनय रहेको छ। अभिनेत्री मिरुना मगरले चलचित्रमा आँखालाई शीतलता दिने दृश्य, कानलाई कर्णप्रिय संगीत र समाजमा देखिने सांस्कृतिक पक्ष प्रस्तुत गरिएको बताइन्।

“बाल्यकाल विदेशमा बितेकाले मलाई नेपाली ग्रामीण समाजको यथार्थ नजिकबाट हेर्ने अवसर यस चलचित्रले दियो,” उनले भनिन्, “मैले आफ्नो भूमिकामा सक्दो मिहिनेत गरेकी छु, यो चलचित्रले गुरुङ, मगर र ब्राह्मण समुदायबीचको संस्कृति, सद्भाव र अन्तरसम्बन्धलाई उजागर गर्ने प्रयास गरेको छ।”

चलचित्रमा गीत–संगीत निर्देशन गायक सुजन चापागाईंले गरेका छन्। उनले चलचित्रमा काम गर्दा नयाँ किसिमको अनुभव सँगालेको बताए।

निर्माण पक्षका अनुसार चलचित्र ‘ऊनको स्वीटर’ यही वैशाख २६ गते नेपालसहित विदेशका विभिन्न देशमा एकैसाथ प्रदर्शनमा आउनेछ। नेपाली समाजको यथार्थ, प्रेम, संस्कृति र जातीय सम्बन्धको गहिरो चित्रण गरेको यस चलचित्रले दर्शकको मन जित्ने निर्माण पक्षको विश्वास छ।