युइएफए च्याम्पियन्स लिग सेमिफाइनलको पहिलो लेगमा पीएसजीको आर्सनलमाथि साँघुरो जित

काठमाडौं –  फ्रेन्च फुटबल क्लब पेरिस सेन्ट जर्मेन (पीएसजी)ले युइएफए च्याम्पियन्स लिग २०२४/२५ को सेमिफाइनलको पहिलो लेगमा इंग्लिस क्लब आर्सनलविरुद्ध साँघुरो तर महत्वपूर्ण जित हात पारेको छ।

बुधबार राति लण्डनस्थित आर्सनलको घरेलु मैदान ‘एमिरेट्स स्टेडियम’मा भएको खेलमा पीएसजीले १-० को जित दर्ता गरेको हो। खेलको शुरुवातमै, चौथो मिनेटमा फ्रेन्च स्टार ओस्मान डेम्बेलेले गरेको गोल नै निर्णायक बन्यो। उनले गोल पोस्ट नजिकैबाट पाएको पासलाई उत्कृष्ट ढंगले जाली चुमाउँदै पीएसजीलाई अग्रता दिलाएका थिए।

यो गोलपछि पीएसजीले पहिलो हाफभर खेलमा दबदबा कायम राख्न सफल भयो। तर, दोस्रो हाफमा आर्सनलले खेलमा फर्किने प्रयास गर्दै आक्रामक फुटबल प्रदर्शन गर्‍यो। आर्सनलले केही अवसरहरू सिर्जना गरे तापनि, गोलमा परिणत गर्न सकेन।

एकपटक भने आर्सनलका खेलाडीले गरेको प्रहार जालीमा पुगेको थियो, तर उक्त गोल अफसाइडको निर्णयसहित रद्द गरिएको थियो।

सन् २००९ यता पहिलो पटक च्याम्पियन्स लिगको सेमिफाइनलमा पुगेको आर्सनलका लागि घरेलु मैदानमै पराजय भोग्नु निराशाजनक रह्यो। अब दोस्रो लेगमा कम्तीमा दुई गोलको अन्तरले जित निकाल्नुपर्ने दबाब आर्सनलमाथि रहेको छ।

दोस्रो लेग अर्को साता पीएसजीको घरेलु मैदान ‘पार्क डे प्रिन्स’मा हुनेछ। यदि पीएसजीले यो अग्रता जोगाउन सफल भयो भने क्लबले फाइनलमा स्थान सुरक्षित गर्नेछ। पीएसजीको लागि यो जित फाइनल यात्रा नजिक ल्याउने महत्वपूर्ण कदम सावित भएको छ।

च्याम्पियन्स लिगको यो सिजनमा पीएसजीले सशक्त प्रदर्शन गरिरहेको छ भने आर्सनल पनि लामो समयपछि सेमिफाइनल सम्म पुगेर ऐतिहासिक प्रदर्शन गरिरहेको थियो। अब दोस्रो लेगको नतिजा नै निर्णायक हुनेछ – कुन टोली युरोपको सबैभन्दा प्रतिष्ठित क्लब फुटबल प्रतियोगिताको फाइनलमा प्रवेश गर्नेछ भन्ने कुराको।