दृष्टि आई केयर सेन्टर, कलंकीको आठौं वार्षिकोत्सव: नयाँ प्रविधि सहितको सेवा विस्तारको घोषणा

काठमाडौं – नेपालमा निजी क्षेत्रबाट सञ्चालित आँखा अस्पतालहरुको सबैभन्दा ठूलो सञ्जाल दृष्टि आई केयर सिस्टम अन्तर्गतको दृष्टि आँखा अस्पताल, कलंकीले आफ्नो स्थापनाको आठौं वर्ष पूरा गरेको छ।

यस अवसरमा अस्पतालले नयाँ प्रविधियुक्त कर्नियल क्रस लिंकिङ (Corneal Cross-Linking) सेवा सुरु गर्ने घोषणा गरेको छ।आठौं वार्षिकोत्सवको अवसरमा आयोजित पत्रकार सम्मेलनमा अस्पतालले आँखा सम्बन्धी जनचेतना अभिवृद्धि र गुणस्तरीय सेवा प्रदान गर्दै ‘सबैका लागि दृष्टि, सधैंका लागि दृष्टि’ को लक्ष्य हासिल गर्न प्राप्त भएको सफलतालाई गर्वका साथ स्मरण गरेको छ।
स्थापनाकालदेखि नै दृष्टि आई केयर सेन्टर, कलंकीले अत्याधुनिक प्रविधिको प्रयोग गरी सर्वसुलभ रूपमा गुणस्तरीय सेवा प्रदान गर्दै आएको छ। अस्पतालले बिना सुई मोतियाविन्दुको शल्यक्रिया सेवा प्रदान गरेर बिरामीहरूलाई सहज, सुरक्षित र आरामदायी उपचार सुविधा उपलब्ध गराउँदै आएको छ।
आठौं वर्ष प्रवेशको अवसरमा अस्पतालले थप एक महत्त्वपूर्ण सेवाको थालनी गरेको छ। अब अस्पतालमा कर्नियल क्रस लिंकिङ (Corneal Cross-Linking) सेवा पनि उपलब्ध हुनेछ। यो सेवा विशेष गरी केराटोकोनस तथा अन्य कर्नियल समस्या भएका बिरामीहरूका लागि अत्यन्तै प्रभावकारी हुने अस्पतालले जनाएको छ। कर्नियल क्रस लिंकिङले कर्नियालाई मजबुत बनाउनुका साथै रोगको नियन्त्रण र दृष्टि संरक्षणमा महत्त्वपूर्ण भूमिका खेल्नेछ।
दृष्टि आई केयर सिस्टम कलंकीका प्रमुख कार्यकारी अधिकृत डा. भाईराजा श्रेष्ठले आठ वर्षको सफल अनुभवले सर्वसुलभ रूपमा नवीन प्रविधि र उच्चस्तरीय सेवामार्फत बिरामीहरूको आँखाको सुरक्षा र उपचारमा थप प्रतिबद्ध रहन प्रेरित गरेको बताउनुभयो। उहाँले बिरामीहरूप्रति समर्पित भएर नै दृष्टि काई केयर सिस्टम कलंकीले कर्नियल क्रस लिंकिङ सेवा सुरु गरेको जानकारी दिनुभयो।
त्यसैगरी, दृष्टि आई केयर सेन्टरका मेडिकल निर्देशक डा. सविता पालिखेले आगामी दिनमा अस्पतालको सेवालाई अझ विस्तार गर्नुका साथै नयाँ प्रविधियुक्त रिफ्राक्टिक सर्जरी सेवा पनि सुरु गरिने जानकारी दिनुभयो। उहाँले अनुभवी र दक्ष चिकित्सकहरूको समूहबाट अत्याधुनिक प्रविधिका साथ आगामी दिनमा बिरामीमुखी तथा गुणस्तरीय सेवा प्रदान गर्ने प्रतिबद्धता व्यक्त गर्नुभयो।
आठौं वार्षिकोत्सवको अवसरमा दृष्टि आई केयर सेन्टरले आफ्ना सम्पूर्ण बिरामी, शुभचिन्तक तथा सहयोगीहरूप्रति हार्दिक आभार प्रकट गरेको छ।