सरकारले आन्दोलनरत शिक्षकसंग सार्थक वार्ता गरोस् : राजेन्द्र पाण्डे

काठमाडौं – नेकपा (एकीकृत समाजवादी)का सांसद राजेन्द्रप्रसाद पाण्डेले आन्दोलनरत शिक्षकसंग वार्ताको नाटक नभई सार्थक वार्ता गरी आन्दोलन टुंग्याउन सरकारसंग माग गरेका छन् ।

आज (आईतवार), प्रतिनिधीसभाको बैठकमा विशेष समयमा बोल्दै पाण्डेले शिक्षकसँग सार्थक वार्ता गरी आन्दोलन टुंग्याउन सरकारसँग माग गरेका हुन् । “सरकारले वार्ताको नाटक होइन, सार्थक वार्ता गरोस् , समस्या समाधान गरोस् । शिक्षकलाई मर्यादित बनाएर विद्यालय कर्मचारीको समस्या समाधान गर्दै सडक आन्दोलनलाई तत्काल टुंग्याउनेमा ध्यान देओस्,” पाण्डेले भने ।

उनले विगतमा जस्तो उधारो सहमति र कार्यान्वय नगर्ने अवस्थाको अन्त्य हुनुपर्नेमा जोड दिए । ०७५ सालमा केपी ओली, ०७८ मा शेरबहादुर देउवा र ०८० मा पुष्पकमल दाहाल ‘प्रचण्ड’ प्रधानमन्त्री हुँदा शिक्षकसँग सहमति गरिएको थियो । तर उक्त सहमती अनुसार शिक्षकहरुको माग सम्बोधन नभएको शिक्षकहरुले गुनाशो गरेको भन्दै उक्त सहमती कार्यान्वयन गर्न पनि पाण्डेले माग गरे ।

पाण्डले आफू पनि पहिला शिक्षक हुँदा स्थायी, सञ्चयकोष, पेन्सनलगायत सुविधा आन्दोलनमार्फत नै निश्चित गरिएको स्मरण गराए । । “त्यति बेला निर्दलीय, पञ्चायती सरकार पनि घुँडा टेकेर सहमति गर्न बाध्य भएको थियो, अहिले त्यो भन्दा फरक अवस्था छ, तर माग सम्बोधन गर्न सरकार किन पछी हट्यो” उनले भने । गणतान्त्रिक सरकारले शिक्षकका माग सुनुवाइ गर्नुपर्नेमा उनले जोड दिए।

त्यस्तै पाण्डेले शिक्षकहरुसंग सार्थक संवाद गर्ने विषयमा सरकारको ध्यान नपुगेको समेत आरोप लगाएका थिए ।