देउवा र प्रचण्डबीच टेलिफोन वार्ता : ओली सरकार धेरै समय नटिक्ने विश्लेषण

काठमाडौं – नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष प्रचण्डबीच टेलिफोन कुराकानी भएको खुलाशा भएको छ ।

आज (बिहीबार) सिंहदबारमा बसेको माओवादी केन्द्र संसदीय दलको बैठकमा प्रचण्डले काँग्रेस सभापति देउवाले आफूलाई टेलिफोन गरेको भनी खुलाशा गरेका हुन् । देउवाको भ्रमणलाई सत्ता परिवर्तनसँग जोडेर टिकाटिप्पणी भइरहेका बेला प्रचण्डले एस्तो खुलाशा गरेका हुन् ।

माओवादी केन्द्र संसदीय दलको बैठकमा प्रचण्डले सभापति देउवाले थाइल्यान्ड प्रस्थान गर्नु अघि आफूलाई टेलिफोन गरेको ब्रिफिङ गरेको प्रचण्ड निकट श्रोतले जनाएको छ । ‘थाइल्यान्ड जानुअघि उहाँले मलाई फोन गर्नुभएको थियो । सो क्रममा शुभकामना आदान प्रदान भएको थियो । फर्किएपछि फेरि भेट्न कुरा भएको छ’, प्रचण्डले बैठकमा भनेका थिए । श्रोतले भन्यो ।

श्रोतका अनुसार देउवाले फोन गरेको अध्यक्ष प्रचण्डले बैठकमा बताएको र वर्तमान सत्ता समीकरणबारे पनि सांसदहरुलाई ब्रिफिङ गरेका थिए । सो क्रममा प्रचण्डले अब केपी ओली नेतृत्वको सरकार धेरै समय नटिक्ने विश्लेषणसहितको ब्रिफिङ गरेको उनको भनाइ थियो ।

उनका अनुसार नयाँ समीकरणका विषयमा भने देउवा थाइल्यान्डबाट फर्किएपछि उनीसँग छलफल गरेपछी मात्र निर्णय गर्ने प्रचण्डले बताएका छन् । त्यस्तै प्रचण्डले अबको प्रधानमन्त्री शेरबहादुर देउवा नै हुने पनि संकेत गरेका छन् ।

वैशाख ७ गते उपचारका लागि भन्दै देउवा थाइल्यान्डको राजधानी बैंकक प्रस्थान गरेका थिए ।