डोटीमा मिनी ट्रक दुर्घटना : ३ जनाको मृत्यु

डोटी – डोटीमा मिनीट्रक दुर्घटना हुँदा चालकसहित तीन जनाको मृत्यु भएको छ ।

आज बुधवार बिहान धनगढीबाट बझाङतर्फ जाँदै गरेको सु.प.प्रदेश ०१–००१ ख ३४२८ नम्बरको मिनी भीमदत्त राजमार्ग अन्तर्गत डोटीको जोरायल गाउँपालिका–१ गोल्डेनमा दुर्घटनामा परेको हो । मिनीट्रक दुर्घटना हुँदा चालकसहित तीन जनाको मृत्यु भएको प्रहरीले जनाएको छ ।

मृत्यु हुनेमा ट्रक चालक बझाङको बुङ्गल नगरपालिका–२, दहबगरका अर्जुन धामी लगायत छन् । मृतक अन्य दुई जनाको सनाखत हुन बाँकी रहेको जिल्ला प्रहरी कार्यालय डोटीका प्रमुख एसपी बिनोद शर्माले जानकारी दिए ।

एसपी शर्माका अनुसार खाद्यान्नका सामान बोकेको मिनीट्रक अनियन्त्रित भई सडकबाट करिब ५० मिटर तल खसेको थियो ।