धादिङ महालक्ष्मी सम्पर्क समाजको तिज विशेष कार्यक्रम सम्पन्न 

पशुपति मरहट्ठा / ललितपुर – धादिङ महालक्ष्मी सम्पर्क समाजको तिज विशेष कार्यक्रमको आयोजना गरेको छ । 

ललितपुर जिल्लाको महालक्ष्मी नगरपालिकामा बसोबास गरिरहेका धादिङ जिल्लाका दाजुभाई , दिदीबहिनीहरूले नजिकिँदै गरेको तिजको अवसरमा एक आपसमा भेला भई परिचयात्मक तिज कार्यक्रम आयोजना गरेको हो ।

कार्यक्रममा महालक्ष्मी नगरपालिकामा बसोवास गर्दै आएका धादिङका विभिन्न स्थानमा घर भएकाहरूबीचको आपसी चिनजान, बसोबासको स्थिति, घर परिवारका सदस्यहरूको अवस्था, रोजगारी, व्यवसाय लगायतका विषयहरूमा चिना परिचय गरिएको थियो ।

गत असार २९ गते ललितपुरको लुभुमा भएको भेलाले थानेश्वर कोइरालाको अध्यक्षतामा धादिङ महालक्ष्मी सम्पर्क समाज गठन गरिएको थियो । आपसमा परिचय गराउने, नियमित भेटघाट गराउने, सामूहिक रुपमा सामाजिक कामहरू गर्ने र दुखः सुखमा साथ सहयोग गर्ने उद्देश्यले समाज गठन भएको अध्यक्ष कोइरालाले जानकारी दिए ।