पहिरोले धानसहितको खेत बगाएपछि खोटाङका कृषक चिन्तित

खोटाङ – खोटाङमा पहिरोले धानबाली सहितको खेत बगाएपछि कृषक चिन्तित भएका छन् । 

गत साउन १६ र १७ गतेको वर्षापछि गएको पहिरोले धानबाली सहितको खेत बगाएपछि दिक्तेल रूपाकोट मझुवागढी नगरपालिका – ४ खाल्लेका कृषक चिन्तित भएका हुन् । पहिरोले स्थानीय कोपिला बस्नेत र डम्बर केसीको धान सहितको १५ – १५ रोपनी खेत पुरेको छ । बर्सेनी १८ मुरी धान फल्ने खेत बगाएपछि गरिखाने खेत बाँकी नरहेको पीडित बस्नेतले बताए । उनको खेतको माथिल्लो भागदेखि नै पहिरो गएको छ ।

‘पहिरोले तीन भागमध्ये दुई भाग खेत बगाइसकेको र अहिलेपनि पहिरोका कारण खेत बग्ने क्रम जारी रहेको उनीहरूले बताएका छन् । पहिरोले त्यहाँको केही घरहरू समेत जोखिममा परेको वडाध्यक्ष खगेन्द्र राईले बताएका छन् । उनका अनुसार पहिरोका कारण त्यहाँको खेतीयोग्य भूमि रहेको त्यस क्षेत्रको जमिन चर्किएको छ ।