ब्राजिलमा विमान दुर्घटना : ६१ जनाको मृत्यु

एजेन्सी – ब्राजिलमा विमान दुर्घटना हुँदा विमानमा सवार ६१ जनाको मृत्यु भएको छ ।

टर्बोप्रप दक्षिणी राज्य परानाको कास्केभेलबाट साओ पाउलो सहरको ग्वारुल्होस विमानस्थलतर्फ  उडिरहेको बेला साओ पाउलोको भिन्हेडो सहरमा खसेको भोपास एयरलाइन्सले जनाएको छ।  

सामाजिक सञ्जालमा भाइरल भइरहेको फुटेजमा पनि विमान ठाडो रूपमा तल झरिरहेको देखिन्छ । विमान खस्दै गर्दा अनियन्त्रित भएर घुमिरहेको भिडियोमा देखिएको छ। एटिआर ७२ – ५०० मा ५७ यात्रु र चालक दलका चार सदस्य सवार थिए । ब्राजिलका राष्ट्रपति लुइज इ नासियो लुला डा सिल्भाले पीडित परिवारप्रति समवेदना व्यक्त गरेका छन् । साओ पाउलो राज्यका गभर्नर टार्सिसियो गोम्स डे फ्रेटासले तीन दिनको शोकको घोषणा गरेका छन्।

अधिकारीहरूले फ्लाइट रेकर्डरहरू प्राप्त गरिसकेको बताएका छन् । फ्रान्सेली – इटालियन विमान निर्माता एटीआरले अनुसन्धानमा सहयोग गर्ने बताएको छ।

विमान आवासीय क्षेत्रमा खसे पनि तर जमिनमा कोही पनि घाइते भएनन्। स्थानीय कन्डोमिनियम कम्प्लेक्समा रहेको एउटा घरमा मात्रै क्षति पुगेको अधिकारीहरूले बताएका छन्। बीबीसी