नोबेल विजेता मोहम्मद युनुस बंगलादेशमा अन्तरिम सरकारको नेतृत्व गर्न सहमत

काठमाडौं – नोबेल शान्ति पुरस्कार विजेता प्राध्यापक मोहम्मद युनुस बंगलादेशमा बनाउने भनिएको अन्तरिम सरकारको नेतृत्व गर्न सहमत भएका छन् ।  प्राध्यापक युनुस अन्तरिम सरकारको  प्रमुख सल्लाहकार बन्न सहमत भएका  द डेली स्टारले जनाएको छ ।

‘सुरुमा छात्रहरूले मलाई सम्पर्क गर्दा त म सहमत थिइनँ । मैले उनीहरूलाई मेरा धेरै कामहरू बाँकी रहेको बताएको थिएँ । तर विद्यार्थीहरूले बारम्बार आग्रह गरिरहे ।’ युनुसको भनाइ उद्धृत गर्दै डेली स्टारले लेखेको छ ।

युनुसलाई विद्यार्थीले गरेको आग्रह भन्दै डेली स्टार अगाडि लेखेको छ, ‘यस आन्दोलनमा धेरै मान्छेले ज्यान गुमाएका छन् जसमा विद्यार्थी र सर्वसाधारण छन् । अब बंगलादेशलाई ठीक ढंगले चलाउने अवसर आएको छ । र, यो तबमात्र सम्भव छ  जब तपाईंले जिम्मेवारी लिनुहुन्छ ।  त्यही भएर पनि हामीले तपाईंलाई जिम्मेवारी लिन आग्रह गरेका हौँ ।’

युनुस यतिबेला विदेशमा  छन् । पेरिस ओलम्पिकको उद्घाटन समारोहमा सहभागी हुन गएका उनले उपचार गर्ने भनेपछि   विदेश भ्रमण लम्बिएको छ । छिट्टै नै उनी स्वदेश फर्कने बताइएको छ । यसअघि युनुसले शेख हसिनाको राजीनामापछि बंगलादेश ‘स्वतन्त्र’ भएको टिप्पणी गरेका थिए ।

भारतीय सञ्चारमाध्यम द प्रिन्टसँगको कुराकानीमा उनले ‘हसिनाको कब्जामा रहेको मुलुक स्वतन्त्र भएको’ टिप्पणी गरेका थिए । हसिनाले आफ्नै बुवा बंगबन्धु शेख मुजिबुर रहमानको ‘विरासत ध्वस्त पार्ने काम गरेको’ युनुसको आरोप छ । हसिनाको सरकारले युनुसलाई १९० भन्दा बढी आरोप लगाएको छ ।