देवीको पोस्टरमा नाजिर र गौरव

काठमाडौँ – नाजिर हुसेन, गौरव पहारी तथा शिल्पा मास्के अभिनीत फिल्म ‘देवी’ को पोस्टर सार्वजनिक गरेको छ । सार्वजनिक २ पोस्टरमा नाजिर र गौरवको लुक देख्न सकिन्छ । यसअघि नै मुख्य अभिनेत्री शिल्पाको पोस्टर सार्वजनिक भइसकेको छ ।

एक्जिबिट स्टुडियोको प्रस्तुतिमा बनेको यस फिल्मले क्राइम थ्रिलर कथा पेस गर्ने जानकारी निर्माणपक्षले जनाएको छ । सञ्जोग राई निर्देशन रहेको यो फिल्म भदौ २१ गतेबाट रिलिज हुनेछ । बाँसुरी फिल्म्ससँगको सहकार्य रहेको यो फिल्म नेपालसहित विदेशमा पनि एकसाथ प्रदर्शनमा आउनेछ ।

यसै फिल्मबाट निर्देशनमा डेब्यू गरिरहेका राईले आफ्नो सिनेमाले महिलामाथि हुने यौनहिंसा विरुद्धको कथा पेस गर्ने बताउँदै आफूले यसमा व्यावसायिकभन्दा पनि इमानदार भएर एउटा राम्रो सिनेमा बनाउने प्रयास गरेको सुनाए ।

फिल्ममा अभिनेत्री शिल्पा पत्रकार, गौरव अपराध अनुसन्धान गर्ने प्रहरी तथा नाजिर एक संस्था सञ्चालकको भूमिकामा छन् । फिल्ममा अभिनेता टीका पहारीको पनि अभिनय रहेको छ ।

रेमन गुरुङ, नारायण राई र सञ्जोग राईको निर्माण रहेको फिल्मको कार्यकारी निर्माता जावेद खान तथा सह–निर्माता उजेन नोर्वे गुरुङ र मिलन लामा हुन् । जोएल फ्रोमले छायांकन गरेको सिनेमाको पटकथामा निर्देशक राईलाई अजय गौतमले सघाएका छन् ।