रास्वपाका महामन्त्री मुकुल ढकाल पदबाट निलम्बित

काठमाडौं – राष्ट्रिय स्वतन्त्र पार्टी (रास्वपा) का महामन्त्री तथा प्रवक्ता डा. मुकुल ढकाल पदबाट निलम्बित भएका छन् । सो पार्टीका महामन्त्री ढकाललाई पदबाट पार्टीले नै निम्बलन गरेको हो ।

बुधबार बसेको केन्द्रीय समितिको बैठकले ढकाललाई पार्टी अनुशासनविपरीत कार्य गरेको भन्दै ७ दिन निलम्बन गर्ने निर्णय गरेको उपसभापति डोलप्रसाद अर्यालले जानकारी दिए ।

ढकालले बुधबार बसेको केन्द्रीय समितिको बैठकमा मुखमा टेप लगाएर विरोध जनाएका थिए । केन्द्रीय अनुशासन आयोगको सिफारिस बमोजिम केन्द्रीय समितिले महामन्त्री तथा प्रवक्ता पदबाट तत्काल लागू हुने गरी ७ दिनका लागि निलम्बन गरिएको उपसभापति अर्यालले बताए ।

ढकाललाई दिएको निलम्बन पत्रमा भनिएको छ, ‘केन्द्रीय समितिको बैठकमा तपाईंले पार्टी अनुशासन विपरीत अभद्र, अशोभनीय, अमर्यादित र अनुशासनहीन व्यवहार प्रदर्शन गर्नुका साथै पार्टीको छविमा प्रतिकूल प्रभाव पार्ने अभिव्यक्ति दिँदै हिँड्नुभएकाले राजनीतिक दल सम्बन्धी ऐन २०७३ को दफा १८, राष्ट्रिय स्वतन्त्र पार्टीको विधानको धारा ५५.७ (क) र (ख) तथा धारा ५६ (१) तथा केन्द्रीय अनुशासन आयोगको नियमावली, २०८० को नियम ५.२ र परिच्छेद ७ को नियम १४ बमोजिम एवं केन्द्रीय अनुशासन आयोगको सिफारिस बमोजिम केन्द्रीय समितिले महामन्त्री तथा प्रवक्ता पदबाट तत्काल लागू हुने गरी ७ दिनका लागि निलम्बन गरिएको व्यहोरा जानकारी गराइन्छ ।’

यसअघि महामन्त्री ढकालले पार्टीलाई प्रतिवेदन नबुझाइ मिडियामा विषय छरपस्ट पारेको भन्दै उनलाई स्पष्टीकरणसमेत सोधिएको थियो । महामन्त्री ढकालले पार्टी अनुशासनविपरीत गतिविधि गरेको भन्दै रास्वपाको अनुशासन समितिले उनलाई स्पष्टीकरण थमाएको हो ।

बुधबारको बैठकमा महामन्त्री ढकालले ३९ जिल्ला घुमेर तयार पारिएको समीक्षा प्रतिवेदनमाथि छलफल गर्दा केन्द्रीय समितिको बैठक लाइभ गर्न माग गरेका थिए । तर, केन्द्रीय सदस्यहरुले लाइभ गर्न नहुनेमा जोड दिएका थिए । त्यसको विरोध गर्दै उनले भनेका थिए ‘बैठक लाइभ नगर्ने निर्णय गराएकाले आफ्नो लोकतान्त्रिक अधिकार,बोल्न पाउने अधिकार हनन् भएकाले पार्टी बैठकमा मुखमा कालो टेप लगाएर उपस्थिति जनाइराखेको छु ।’