ओली र देउवासहित प्रधानमन्त्री दाहाल गिरिजाको तस्विर अवलोकनमा

काठमाडौं – सोमबार मध्यरातमा नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओली मिलेर नयाँ सरकार गठनको सहमति भएपछि मंगलबार ओली र देउवासहित प्रधानमन्त्री पुष्पकमल दाहाल ‘प्रचण्ड’ तत्कालीन कांग्रेस सभापति एवं प्रधानमन्त्री गिरिजाप्रसाद कोइरालाको तस्विर अवलोकनमा कांग्रेस मुख्यालय सानेपामा पुगेका छन् ।

पूर्वप्रधानमन्त्री एवं नेपाली कांग्रेसका तत्कालीन सभापति गिरिजाप्रसाद कोइरालाको १००औँ जन्मजयन्तीका अवसरमा आयोजित कार्यक्रममा सहभागी हुन उनीहरू मंगलबार सानेपा पुगेका हुन् ।

कांग्रेस र एमालेबिच सहमति भएपछि कांग्रेस सभापति देउवासँग प्रधानमन्त्री दाहाल एउटै कार्यक्रममा देखिएका छन् । सोमबार मध्यरातमा प्रचण्ड नेतृत्वको सरकार ढालेर एमाले अध्यक्ष ओलीलाई प्रधानमन्त्री बनाउने सहमति भएको थियो।

पूर्वसभापति कोइरालाको शताब्दी जन्मजयन्तीको अवसरमा कांग्रेसले फोटो प्रदर्शनी समेत गरेको छ । कार्यक्रममा एमालेका अध्यक्षसहित शीर्ष नेताहरू पनि पुगेका छन् ।

नेपाली कांग्रेसले काठमाडौंमा आयोजित स्वर्गीय गिरिजाप्रसाद कोइरालाको शताब्दी ‘क्रान्तिदेखि शान्तिसम्म’ विषयक फोटो प्रदर्शनीमा यी तीनै नेता सँगै सहभागी भएका हुन् ।