रुससँगको युद्ध अन्त्य गर्ने योजना तयार पार्दै जेलेन्स्की

युक्रेन – युक्रेनी राष्ट्रपति भोलोदिमिर जेलेन्स्कीले रुससँगको युद्ध अन्त्य गर्न विश्वको बहुमतले समर्थन गर्ने व्यापक योजना तयार गरिरहेको अल जजिराले जनाएको छ । ‘विश्वको बहुमतले समर्थन गर्ने युद्ध अन्त्य गर्ने योजना ल्याउनु हाम्रो लागि धेरै महत्वपूर्ण छ,’ युक्रेनी राष्ट्रपतिले स्लोभेनियाका राष्ट्रपति नतासा पिरक मुसारसँग राजधानी किभमा आयोजित पत्रकार सम्मेलनमा भने । ‘यो कूटनीतिक मार्गका लागि हामीले काम गरिरहेका छौँ,’ उनले भने ।

राष्ट्रपति जेलेन्स्की र रुसी राष्ट्रपति भ्लादिमिर पुटिनको सार्वजनिक बयानका आधारमा युक्रेन र रसियाबीच हाल कुनै वार्ता भएको पाइएको छैन ।  युक्रेनले बारम्बार शान्तिवार्ता सुरु हुनुअघि रुसले क्रिमियाको प्रायद्वीपसहित अन्य क्षेत्रबाट आफ्नो सेना फिर्ता लानुपर्ने माग राखेको छ ।

तर, फेब्रुअरी २०२२ मा युक्रेनमा आक्रमण सुरु गरेका रुसी राष्ट्रपति भ्लादिमिर पुटिनले युक्रेनलाई रुसको कब्जामा रहेको आफ्नो पूर्व र दक्षिणको थप क्षेत्र खाली गरेर प्रभावकारी रूपमा आत्मसमर्पण गर्न माग गरेका छन् ।

यस महिनाको सुरुमा युक्रेनी राष्ट्रपतिले स्विट्जरल्यान्डमा एउटा प्रमुख अन्तर्राष्ट्रिय शिखर सम्मेलनको आयोजना गरेका थिए, जहाँ युक्रेनको स्थितिका लागि समर्थन जुटाउन रुसलाई आमन्त्रित गरिएको थिएन । यसअघि बिहीबार ब्रसेल्समा आयोजित युरोपेली संघ (इयू) शिखर सम्मेलनमा जेलेन्स्कीले युद्ध अन्त्य गर्न केही महिनाभित्र विस्तृत योजना प्रस्तुत गर्ने बताएका थिए ।

यसैबीच, रुसको सीमावर्ती गाउँमा युक्रेनी ड्रोन आक्रमणमा पाँचजनाको मृत्यु भएको छ । युक्रेनको सिमानाबाट केही मिटर पर रहेको रुसको कुस्र्क क्षेत्रको एउटा सानो गाउँ गोरोडिस्चको एउटा घरमा ड्रोन आक्रमण हुँदा दुई बालबालिकासहित पाँचजनाको मृत्यु भएको क्षेत्रीय गभर्नरले बताए । कुस्र्कका गभर्नर एलेक्सई स्मिर्नोभले सामाजिक सञ्जाल टेलिग्राममा भने, ‘आक्रमणमा दुई साना बच्चासहित पाँच व्यक्तिको मृत्यु भएको छ । परिवारका अन्य दुई सदस्यको अवस्था गम्भीर रहेको छ ।’

सन् २०२२ फेब्रुअरीमा सुरु भएको द्वन्द्वमा दुवै पक्षले सयौँ किलोमिटरसम्मको दायरासहित ठूला विस्फोटक शिल्पसहितका ड्रोन प्रयोग गरेका छन् । युक्रेनले यस वर्ष रुसी भूभागमा आफ्नो आक्रमणलाई तीव्र पारेको छ ।