एम्बाप्पेले ओलम्पिक गुमाउने

पेरिस – फ्रान्सका स्ट्राइकर किलियान एम्बाप्पेले आफ्नो नयाँ क्लब रियल मड्रिडले आफूलाई यो वर्ष पेरिसमा हुने ओलम्पिक्समा भाग लिने अनुमति नदिएको बताएका छन् ।

२५ वर्षीय खेलाडीले ओलम्पिक्समा खेल्ने आफ्नो चाहना रहे पनि रियलले युरो २०२४ मा सहभागी हुने कुनै पनि खेलाडीले ओलम्पिक्समा खेल्न नपाउने बताएको खुलासा गरेका हुन् । यसले गर्दा गत ३ जुनमा घोषणा भएको फ्रान्सको प्रारम्भिक टोलीमा समेत उनको नाम समावेश गरिएको छैन ।

पेरिस सेन्ट जर्मेनसँगको उनको करार यही जुन ३० मा समाप्त हुँदै छ । उनले त्यसपछि रियल मड्रिडसँग अनुबन्ध हुने सहमति गरिसकेका छन् । ‘मेरो क्लबको भनाइ स्पष्ट छ, त्यही भएर म ओलम्पिक्समा भाग लिन्नँ’, सोमबार युरो २०२४ मा हुने अस्ट्रियाविरुद्धको खेलअघि एम्बाप्पेले भने ।उनले थपे, ‘म फ्रान्सको टोलीलाई शुभकामना दिन चाहन्छु । म हरेक खेल हेर्नेछु । आशा छ टोलीले स्वर्ण पदक जित्नेछ ।’

पुरुष ओलम्पिक फुटबल प्रतियोगिता युरो फाइनलको १० दिनपछि २५ जुलाईबाट सुरु हुँदै छ । यो अगस्त ९ मा सकिन्छ, जुन ला–लिगा सिजन सुरु हुनुभन्दा एक हप्ताअघि हो ।

ओलम्पिक फुटबल प्रतियोगितामा यु–२३ टोलीले भाग लिन्छ । तर, हरेक राष्ट्रले ३ जना २३ वर्षमाथि खेलाडीहरू समावेश गर्न पाउँछ । दुईपटकको युरोपियन च्याम्पियन फ्रान्स युरो २०२४ को प्रमुख दाबेदार टोली हो । डिडिएर डेसच्याम्पस जर्मनीका बर्टी भोग्ट्सपछि खेलाडी र म्यानेजरका रूपमा युरोपियन च्याम्पियनसिप जित्ने मात्र दोस्रो व्यक्ति बन्ने होडमा छन् ।