यी हुन् गृहमन्त्री लामिछानेविरुद्ध कांग्रेसले संसदमा पेस गरेको चार प्रमाण

काठमाडौं – सहकारी संस्थामा सदस्य नै नभई गैरकानुनी तवरले कर्जा लिएको र आर्थिक अपचलनमा संलग्न भएको भन्दै उपप्रधान तथा गृहमन्त्री रवि लामिछानेको राजीनामा माग गर्दै प्रमुख प्रतिपक्षी दल नेपाली कांग्रेसले संसदमा निरन्तर अवरोध गर्दै आएको छ ।

काँग्रेसले लामिछानेलाई रोस्ट्रममा उभिने वातावरण समेत दिएको छैन भने प्रधानमन्त्रीमार्फत निरन्तर जवाफ माग गरिरहेको छ । काँग्रेसले प्रधानमन्त्रीमार्फत निरन्तर जवाफ माग गरेपछी आज मंगलबार प्रधानमन्त्री पुष्पमकमल दाहाल प्रचण्डले संसदमा उठेका प्रश्नहरूको जवाफ दिएका थिए ।

१३ जना सांसदका प्रश्न सामना गरेका प्रधानमन्त्री प्रचण्डले गृहमन्त्री लामिछानेबारे दिएको जवाफमा कांग्रेसले चित्त बुझाएको छैन । प्रचण्डले, लामिछाने सहकारीको सञ्चालक समिति, लेखा समिति, ऋण समिति, कर्मचारीलगायत कुनै पनि जिम्मेवारी र भूमिकामा नरहेको र अदालतमा विचाराधीन मुद्दामा पनि कहीँकतै नजोडिएको भन्दै लामिछानेको बचावट गर्दै उक्त विषयलाई राजनीतिकरण नगर्न आग्रह गरे ।

एकपटक अनुसन्धान सकिएर अदालतमा मुद्दा दायर भइसकेको विषयमा आधार प्रमाणबिनाको जाहेरी पुनः दर्ता गर्न आवश्यक नहुने प्रधानमन्त्री प्रचण्डको भनाइ थियो । लामिछानेको बचावट गर्दै प्रचण्डले ‘उजुरी पर्नासाथ राजीनामा दिने हो भने के हुन्छ ?’ भन्दै प्रति प्रश्न पनि गरेका थिए । ‘मुद्दा बुझाइसक्दासम्म उहाँको नाममा उजुरी, निवेदन केही छैन । उजुरी पर्नासाथ राजीनामा दिने हो भने के हुन्छ ? हामी उजुरी दर्ता हुनासाथ राजीनामा दिने सहमति गर्न सक्छौँ ?,’ उनले भने, ’गृहमन्त्रीबाट चाहिँ हटाऊ, मुद्दा प्रभावित हुन्छ भन्न खोजेको हो भने प्रभावित पार्नेले अर्को मन्त्रालयमा बसे पनि पार्ला । सरकारमा बसे मात्रै पनि पार्ला । त्यसैले यो विषयलाई राजनीतीकरण नगरौँ ।’ प्रचण्डले भने ।

कांग्रेसले गृहमन्त्री लामिछानेको संलग्नता पुष्टि प्रधानमन्त्रीले नदेखे संसदीय समिति बनाएर छानबिन गर्न माग गर्दै आएको छ ।

त्यस्तै प्रधानमन्त्रीमार्फत जवाफ माग्ने क्रममा कांग्रेस प्रमुख सचेतक रमेश लेखकले लामिछानेबीरुद्ध संलग्नता पुष्टि हुने चारवटा प्रमाण संसदमा पेस गरेका थिए । उनले प्रधानमन्त्री अँध्यारोमा रहेको भन्दै चिन्ता पनि व्यक्त गरे । ‘यो कुरामा हाम्रो चित्त त बुझेन बुझेन चित्त बुझ्ने ठाउँ पनि पटक्कै भएन । बरु थप चिन्ता जाग्यो । प्रधानमन्त्रीलाई ने गलत जानकारी दिइँदै छ । गलत सूचना प्राप्त हुँदै छ । प्रधानमन्त्रीजी नै अँध्यारोमा हुनुहुन्छ भने यो कुराको निष्पक्ष छानबिन होला ? प्रधानमन्त्रीले भन्नुभयो प्रमाण छैन,’ लेखकले भने ।

लेखकले लामिछानेबीरुद्ध संलग्नता पुष्टि हुने चारवटा घटनाक्रम प्रमाणको रूपमा प्रस्तुत गरेका छन् ।

पहिलो प्रमाण : सूर्य दर्शन सहकारीबाट लामिछानेको नाममा  भएको कर्जा फर्छ्योट ।
‘पोखरा महानगरपालिकाले सूर्य दर्शन सहकारीबाट गोर्खा नेटवर्क प्रालिको नाममा रवि लामिछानेको नाममा पुलेसो कर्जा नं ११६÷४४५६ खडा गरी खाता गरी पेस्की फर्छ्योट ग¥यो भनेर लेखेको प्रमाण होइन ?,’ लेखकले भने ।

दोश्रो प्रमाण : लामिछानेबीरुद्ध २०८० माघ २२ गते जिल्ला प्रशासन कार्यालयमा दर्ता भएको जाहेरी 

लेखकले दोस्रो प्रमाण स्वरुप पीडितहरूले २२ माघ २०८० मा जिल्ला प्रशासन कार्यालयमा दिएको जाहेरी पेस गरेका थिए । ‘२०८० माघको २२ गते जाहेरी दर्ता छ । पुरानै जाहेरी दरखास्त भएकाले यसैको निरन्तरता हुन्छ भनेर प्रहरी प्रशासनले त्यसलाई रेकर्डमा राखेको छ । यो पीडितहरूले दिएको जाहेरी दरखास्त प्रमाण होइन ?,’ लेखकले भने ।

तेश्रो प्रमाण : पोखरामा सहकारीका पीडितहरूसंगको प्रधानमन्त्री प्रचण्डको भेटघाट

लेखकले तेश्रो प्रमाणको रूपमा प्रधानमन्त्री प्रचण्ड पोखरा जाँदा सूर्य दर्शन सहकारीबाट गोर्खा नेटवर्क प्रालिको नाममा रवि लामिछानेको नाममा रवी लामिछानेले ऋण लगानी गरेको भन्दै आन्दोलित भएको र आन्दोलनकै क्रममा प्रधानमन्त्री प्रचण्ड पोखखा आँउदा पीडितहरूले भेटेको कुरालाई पनि प्रमाणको रुपमा पेस गरे ।

चौथो प्रमाण : प्रधानमन्त्रीको बचावट

लेखकले चौथो प्रमाणका रुपमा प्रधानमन्त्री प्रचण्डको जवाफलाई पनि पेस गरेका छन् । १३ जना सांसदका प्रश्न सामना गरेका प्रधानमन्त्री प्रचण्डले गृहमन्त्री लामिछानेबारे दिएको जवाफमा ‘एकपटक अनुसन्धान सकिएर अदालतमा मुद्दा दायर भइसकेको विषयमा आधार प्रमाणबिनाको जाहेरी पुनः दर्ता गर्न आवश्यक नहुने प्रधानमन्त्री प्रचण्डको भनाइ’ लाई सत्ता जोगाउने मेसो भन्दै प्रधानमन्त्रीले उनको बचावट गर्नुपनि प्रमाणको रुपमा लिएका थिए ।

यसमा जानकारी दिनुपर्ने निकायले प्रधानमन्त्रीलाई जानकारी नदिएको लेखकको दाबी थियो । उनले प्रधानमन्त्री प्रचण्डले गम्भीरतापूर्वक यो विषयलाई नहेरेको समेत बताएका थिए ।