काठमाडौं – शुक्रबार मात्र नेपाल प्रहरीले पूर्व उपराष्ट्रपति नन्दबहादुर पुनका छोरा दीपेश पुनलाई सुन तस्करी प्रकरणमा पक्राउ गरेको छ । माओवादी केन्द्रको विद्यार्थी संगठन अनेरास्ववियु क्रान्तिकारीका महासचिव समेत रहेका पुनको सुन तस्करसँग एकाघरकैजस्तो नाता जोडिएको पहिलेदेखि नै चर्चा चल्दै आएको थियो ।

२ साउनमा बरामद ६० किलो सुन तस्करी प्रकरणका मुख्य आरोपी दावा छिरिङसँग उनको सम्बन्ध देखिएपछि पुन छानबिनको दायरामा परेका थिए । तर, सिआइबीले गम्भीरतापूर्वक अनुसन्धान नगरी उनलाई उन्मुक्ति दिएको सुन जाँचबुझ आयोगको प्रतिवेदनमा पनि उल्लेख छ । सुनसम्बन्धी जाँचबझ आयोगले पनि बिहीबार बुझाएको प्रतिवेदनमा पुनविरुद्ध अनुसन्धान नगरी सिआइबीले उन्मुक्ति दिएको निष्कर्ष निकालेको थियो । सुन प्रकरणमा पुर्पक्षका लागि थुनामा रहेका दावा छिरिङसँग दीपेशको बाक्लो उठबस रहेको भेटिएको थियो ।स्रोतका अनुसार, छिरिङसँग उनले केही कम्पनीमा साझेदारीसमेत गरेका थिए । सिआइबीमा गरेको बयान कागजमा पुनले दावासँगको चिनजान र सम्बन्धलाई समेत स्वीकार गरेका थिए । तर, सुन कारोबारमा संलग्न नरहेको दाबी गरेका थिए ।

सुन तस्करी प्रकरणमा नेकपा (माओवादी केन्द्र) मा शक्तिशाली मानिएका दुई पुनमध्ये नन्दबहादुर पुनको परिवारमा प्रहरीले हात हाले पनि बर्तमान अर्थमन्त्रीसमेत रहेका वर्षमान पुनको परिवारलाई भने छोएको छैन । यद्धपी सुन तस्करी जाँचबुझ आयोगले अर्थमन्त्री पुनको परिवारको पनि दावा छिरिङसँग व्यापारिक साझेदारी रहेको तथ्य फेला पारेको छ । दावा छिरिङले काठमाडौँ – २९ मा सञ्चालन गरेको भियना मल्टिपर्पोज ग्रुप प्रालिको सेयर धनीमा दावाकी श्रीमती अमला रोकासहित ४ जनाको लगानी छ । जसमा वर्षमान पुनका कान्छा भाइ प्रनिश पुन मगरको पनि लगानी रहेको तथ्य जाँचबुझ आयोगको प्रतिवेदनमा उल्लेख छ ।

प्रनिश पुन मगरको नाममा मात्रै ३० हजार कित्ता सेयर रहेको पाइएको छ । २०८० साल वैशाख १९ गते कम्पनी रजिस्ट्रार कार्यालयमा अद्यावधिक गरिएको यो अभिलेखमा ३० हजार कित्ता सेयर प्रनिशको नाममा छ । अमलाकै परिवारका ३ जनाको सेयर रहेको यो कम्पनीमा वर्षमान पुन परिवारका एक जनाको सेयर रहेको भेटिएको थियो । पुनका भाइ प्रनिश पुन सेयरधनी रहेको यो कम्पनीले सोह्रखुट्टे र टोखामा तस्करीको सुन पगाल्ने कारखाना नै चलाएको प्रहरीले फेला पारी मेसिनहरू पनि बरामद गरेको थियो ।

यो कम्पनीले खानी तथा भू–गर्भ विभागमा सुन उत्खनन तथा प्रशोधनका लागि लाइसेन्स माग गर्दै निवेदन दिएको थियो । उक्त कम्पनीले २०७७ माघ २९ गते लाइसेन्स पनि पाएको देखिएको छ । यो समूहले लाइसेन्स लिँदा रोल्पाको सुनछहारीमा २९ किलोमिटरभित्र सुन उत्खनन गर्ने भन्दै आश्वस्त पारेको बताइन्छ ।

आयोगका अध्यक्ष डिल्लीराज आचार्य आफूहरूले प्रतिवेदनमा सुधार्नुपर्ने कुराहरू, छानबिनमा भएका त्रुटिहरू, मुद्दा चलाउनुपर्ने व्यक्तिहरू, विभागीय कारबाही गर्नुपर्ने व्यक्तिहरूका बारेमा किटानी गरेको बताउँछन् । उनले भने, ‘प्रतिवेदनमा नीतिगत सुधार, क्षमता अभिवृद्धिमा सुधार, कारबाही गर्नुपर्ने आधार र कारणसमेत प्रतिवेदनमा उल्लेख गरेका छौँ । जसमा विभागीय कारबाही पनि परेका छन् ।’

यो पनी पढ्नुहोस् ।

सुन तस्करसँग नाता जोडिएको दिपेष पुन र सुनको अन्तरसम्बन्ध