स्रोत नखुलेको १० लाख रूपैयाँसहित रौतहटबाट २ जना पक्राउ

काठमाडौं– नेपाली नम्बरको ब्रेजा कार र १० लाख नगद रुपैयाँ सहित हेटौंडाका दुईजना रौतहटबाट पक्राउ परेका छन् । दुवैजनालाई रौतहट स्थित प्रहरीले पक्राउ गरेको हो ।

पक्राउ पर्नेमा मकवानपुर हेटौंडा उपमहानगरपालिका–३ बस्ने ३० वर्षीया मरमती मोक्तान र ३६ वर्षीय देवराज थिङ रहेको जिल्ला प्रहरी प्रमुख एसपी महेन्द्र कुमार श्रेष्ठले बताएका छन् ।

इलाका प्रहरी कार्यालय बन्जरहाबाट गएको प्रहरी टोलीले ईशनाथ नगरपालिका– १ बाट शंका लागेर उनीहरूले प्रयोग गरेको प्र३०१–०२३च ५३८५ नम्बरको कारलाई जाँच गर्ने क्रममा उक्त नगद सहित दुवैजना लाई पक्राउ गरिएको हो ।

कारमा पछाडि सवार देवराज थिङ्ले बोकेको कालो रंगको झोला भित्र लुकाई छिपाई राखेको स्रोत नखुलेको नेपाली १००० दरको नाट थान ८५० र ५०० दरको ३०० थान जम्मा जम्मा १० लाख रुपैयाँ सहित दुवैजना लाई पक्राउ गरिएको जिल्ला प्रहरी प्रवक्ता डिएसपी एलिजा गिरीले बताएकी छन् ।