सडकबाट टिपर खस्दा रामेछापमा चालकको मृत्यु

रामेछाप – रामेछापको मन्थलीमा सडकबाट टिपर खस्दा चालकको मृत्यु भएको छ ।

मन्थली नगरपालिका -६ सेलेघाट सिल्लीबजारमा टिपर सडकबाट खसेर चालकको मृत्यु भएको जिल्ला प्रहरी कार्यालय रामेछापले जनाएको छ । सुनकोसी मरिन डाइभर्सनको बा २ क ४५०७ नम्बरको टिपर काम गर्ने सिलसिलामा अनियन्त्रित भई सडकबाट १५० मिटर तल खसेको हो ।

टिपर दुर्घटनामा पर्दा महोत्तरी बर्दिबास नगरपालिका – ४ गौरीडाँडा बस्ने ५० वर्षीय जयबहादुर माझीको मृत्यु भएको हो । घटनाबारे अनुसन्धान भइरहेको प्रहरीले जनाएको छ ।