चलचित्र ‘जिग्री’ को ट्रेलर सार्वजनिक

काठमाडौं – पैसाको चक्करले दुई युवाले भोग्नु परेको संघर्षको कथा रहेको चलचित्र ‘जिग्री’ को ट्रेलर सार्वजनिक भएको छ ।

फागुन ४ गतेबाट देशव्यापी प्रदर्शनमा आउने तयारीमा रहेको यो चलचित्रको सार्वजनिक टे«लरमा पैसाको चक्करले युवाले जीवनमा भोग्नु पर्ने उल्झनलाई कथालाई प्रस्तुत गरिएको छ । आकाश मगरले निर्देशन गरेको चलचित्रको ट्रेलर कमेडी–क्राइम–एक्सनको संयोजन गरिएको छ ।

‘जिग्री’ काठमाडौंमा अनेकन महत्वकांक्षा बोकेर आएका फरक व्यवहार भएका दुई केटाको कथा हो । ती युवाहरूले महँगी र अभावमा काठमाडौंमा झेल्नु परेको कष्टकर जीवन र टिकेर बस्नका लागि गरेको संघर्ष नै चलचित्रको मुख्य कथा हो । कुसुम थापा मगर कार्यकारी निर्माता रहेको चलचित्रको निर्माता कुमार श्रेष्ठ हुन् । सुमित भट्ट र सोमित माझीले छायांकन गरेको चलचित्र सम्पादन सरुन मानन्धरले गरेका हुन् । चलचित्रको कास्टिङ निर्देशक केदार श्रेष्ठ रहेको छन् ।

यस चलचित्रमा आकाशसहित अभयराज बराल, पशुपति राई, सुशीलराज पाण्डे, सुप्रिया राना, रोशन सुवेदी, केदार श्रेष्ठ, दिवाकर घिमिरे, जीवन बराल, वासुदेव खनाल, शंकर भण्डारी, नवीन लम्साल, सुशीला लक्ष्मी महर्जन, मनिष व्याञ्जु, स्नेहा रसाइली, अर्जुन पौडेल लगायतका कलाकारको अभिनय छ ।