अमिन गोविन्द ढकालविरुद्ध अख्तियारद्धारा भ्रष्टाचार मुद्दा दायर

काठमाडौं –  अख्तियार दुरुपयोग अनुसन्धान आयोगले ४ हजार घुससहित पक्राउ परेका अमिन गोविन्द ढकालविरुद्ध विशेष अदालतमा भ्रष्टाचारको मुद्दा दायर गरेको छ ।

नापी कार्यालय, नवलपरासी (बर्दघाट सुस्ता पश्चिम) का अमिन ढकालले जग्गा नापजाँच गरी लालपूर्जा दिलाउने प्रयोजनार्थ सेवाग्राहीसँग घुसररिसवत माग गरिरहेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको कार्यालय, बुटवलबाट खटिई गएको टोलीले नियन्त्रणमा लिएर छानबिन गर्दा घुस लिएको पुष्टि भएपछि अख्तियारले मुद्दा दायर गरेको हो ।

अख्तियारमा प्रवक्ता नरहरि घिमिरेले विज्ञप्ति जारी गर्दै ढकालले जग्गा नाँपजाँच गरी लालपुर्जा दिने प्रयोजनार्थ सेवाग्राहीसँग घुस रिसवतवापत चार हजार रुपैयाँ माग गरी लिएको पुष्टि भएकोले भ्रष्टाचार निवारण ऐन, २०५९ को दफा ३ अन्तर्गतको कसुर गरेको हुँदा निज गोविन्द ढकाललाई भ्रष्टाचार निवारण ऐन,२०५९ को दफा ३ को उपदफा १ बमोजिमको कसुरमा बिगो चार हजार रुपैयाँ कायम गरी भ्रष्टाचार निवारण ऐन, २०५९ को दफा ३ को उपदफा १ को देहाय क बमोजिम कैद सजाय गरी सोही ऐनको दफा ३ को उपदफा १ अनुसार बिगो बमोजिम जरिवाना सजायसमेत हुन मागदाबी लिई आज विशेष अदालत काठमाडौंमा आरोपपत्र दायर गरिएको जनाएको छ ।