निता आचार्यको नयाँ गीत ‘झिमझिम परेली’ सार्वजनिक

काठमाडौं – प्रवासमा रहेर गायन सक्रिय गायिका निता आचार्यको नयाँ गीत ‘झिमझिम परेली’ सार्वजनिक भएको छ ।

गायिका आचार्यलाई स्वरमा प्रताप दासले साथ दिएका छन् । उक्त गीतको भिडियो काठमाडौंमा एक समारोहबीच अग्रज गायिका ज्ञानु राणाको प्रमुख आतिथ्यतामा सार्वजनिक गरिएको हो । डिपी खनालको शब्द रचना रहेको गीतमा शंकर थापा ‘स्माईल’ को संगीत र बिषम आचार्यको संगीत संयोजन छ । कुमार केसीले स्टुडियो फिलमा रेकर्डिङ गरेको गीतमा अशोक महर्जनको ध्वनि सम्पादन र मिश्रण छ ।

केशवराज भट्टले निर्देशन गरेको गीतको भिडियोमा अलिशा शर्मा र बद्रीप्रसाद तिवारीको अभिनय छ । नवराज उप्रेतीको छायांकन रहेको भिडियोमा बन्दे प्रसादको सम्पादन छ । गीतको भिडियो निता आचार्य अफिसियल युट्युब च्यानलमार्फत सार्वजनिक गरिएको छ ।

गायिका आचार्यको सभापितत्वमा भएको कार्यक्रममा गीतकार संघका अध्यक्ष वसन्त वित्यासी थापा, नेपाली फिल्म सोसाइटीका अध्यक्ष, अभिनेता एवं निर्माता कृष्ण मल्ल, संगीत तथा चलचित्र उत्पादक समाज नेपालका अध्यक्ष सूर्यबहादुर मगर, पिम नेपालका अध्यक्ष माधव खरेल, अभिनेत्री शर्मिला मल्ल, देउडा गायक नन्दकृष्ण जोशी, गायिकाका बुबा सुरेन्द्रप्रसाद आचार्य लगायतको उपस्थिति रहेको थियो । अभिनेता एवं निर्माता कृष्ण मल्लले गीत कलाक्षेत्रको सर्वव्यापी माध्यम भएको बताउँदै सार्वजनिक गीत ‘झिम झिम परेली’ सबैले रुचाउनेमा आफू विश्वस्त रहेको बताए । गीतकार संघका अध्यक्ष थापाले राम्रो गीत र भिडियो पनि राम्रो बनेको बताए ।

संगीतकार शंकर थापा स्माइलले गीतको रेकर्डिङदेखि भिडियो बन्दासम्मको आफ्नो अनुभव सुनाएका थिए । गायिका आचार्यले आफू जहाँ भए पनि गीत संगीतसँग जोडिने बताउँदै छिट्टै अर्को गीत पनि स्रोता–दर्शकमाझ ल्याउने तयारीमा रहेको जानकारी दिइन् । कार्यक्रमको सहजिकरण सञ्चारकर्मी गीता अधिकारीले गरेकी थिइन् ।