काभ्रेमा कोइला बालेर सुतेका श्रीमानको ज्यान गयो, श्रीमती बेहोस

काठमाडौं– काभ्रेमा कोइला बालेर सुतेका एक जनाको मृत्यु भएको छ, भने अर्का बेहोस भएका छन् ।

नमोबुद्ध नगरपालिका– १ घर भएका ८२ वर्षीय कर्मा ग्याल्बो लामा आज बिहान ओछ्यानमै मृत फेला परेका हुन् ।

गएराति आफ्नै घरको कोठामा विद्युतीय हिटर र कोइला बालेर पतिपत्नी सुतेका थिए । ग्याल्बोकी ८१ वर्षीया पत्नी असनी लामा बेहोस अवस्थामा
फेला परेको जिल्ला प्रहरी कार्यालय काभ्रेले जनाएको छ ।

उनीहरू मंगलबार बिहान ८ बजेसम्म पनि नउठेपछि छोरा बुहारीले ढोका खोलेर हेर्दा दुबै जना बेहोस अवस्थामा फेला परेका थिए । त्यसपछि छोराबुहारीले तत्कालै उनीहरुलाई धुलीखेल अस्पताल पुर्याएका थिए ।

अस्पताल पुर्याउनासाथ ल्याल्बोलाई चिकित्सकले मृत घोषणा गरेको प्रहरीले जनाएको छ । उनीहरुले चिसोबाट जोगिन हिटर र फलामको कराइमा आगो बालेर झ्याल ढोका बन्द गरि सुतेको पाइएको छ ।