सेयर बजार ३८ अङ्कले बढ्यो, ६ महिनायताकै उच्च कारोबार

काठमाडौं – सेयर बजार आज पनि दोहोरो अङ्कले बढेको छ । पछिल्ला केही दिनदेखि लगातार बढिरहेको सेयर बजार परिसूचक नेप्से आज ३८ दशमलव १४ अङ्कले बढेर दुई हजार ६० दशमलव ४९ विन्दुमा पुगेको छ ।

आज जलविद्युत् बाहेक सबै समूहको सेयर बढेको छ । माइक्रोफाइनान्स समूहको सेयरमा हरियाली छाएको छ । आज बोटलर्स नेपाल, सूर्योज्योति लाइफ, स्वरोजगार लघुवित्त, जीवन विकास लघुवित्त, वीपीडब्ल्यू लघुवित्त, नरुडे लघुवित्त, धौलागिरि लघुवित्त, मुक्तिनाथ कृषि कम्पनी र हाथवे इन्भेस्टमेन्ट नेपाल कम्पनीको सेयर १० प्रतिशतले बढेर सर्किट लागेको छ ।

समग्रमा बजार बढेको दिन आज हिमालयन पावर पार्टनर कम्पनीको सेयर सबैभन्दा धेरै झन्डै आठ प्रतिशतले ओरालो लागेको छ ।

आज छ महिनायताकै उच्च कारोबार भएको छ । आज दुई करोड १४ लाख कित्ता सेयर छ अर्ब ८६ करोड ८१ लाख रुपैयाँमा कारोबार भएका छन् ।

गएको असार १० गते यता छ अर्ब रुपैयाँभन्दा धेरैको कारोबार भएको आज पहिलो पटक हो । आज सबैभन्दा धेरै हिमाल दोलखा हाइड्रोपावर कम्पनीको २६ करोड २६ लाख रुपैयाँको सेयर किनबेच भएको छ ।