सेयर बजारमा सामान्य वृद्धि, ३ अर्ब ९० करोड रुपैयाँको कारोबार

काठमाडौं – सेयर बजार आज सामान्य बढेको छ । दिनभर उतारचढाव भएको सेयर बजार परिसूचक नेप्से आज २ दशमलव ६० अङ्कले बढेर १ हजार ९ सय ८८ दशमलव ०४ विन्दुमा पुगेको छ ।

आज होटल तथा पर्यटन, बीमा र व्यापारबाहेक अरू समूहको सेयर बढेकोमा विकास बैंक, उत्पादन तथा प्रशोधन, माइक्रोफाइनान्स समूहको सेयर उच्च अङ्कले उकालो लागेको छ ।

आज बोटलर्स नेपालको सेयर सबैभन्दा धेरै १० प्रतिशतले बढेको छ । समग्रमा बजार बढेको दिन कुथेरी बुखारी हाइड्रोपावरको सेयर भने साढे ५ प्रतिशतभन्दा धेरैले घटेको छ ।

आज १ करोड २० लाख कित्ता सेयर ३ अर्ब ९० करोड रुपैयाँमा कारोबार भएको छ । आज सबैभन्दा धेरै सोनापुर मिनरल्स एन्ड आयल लिमिटेडको १४ करोड ६७ लाख रुपैयाँको सेयर किनबेच भएको छ ।