सेयर बजारमा दोहोरो अङ्कको गिरावट, १ अर्ब ५४ करोड रुपैयाँको कारोबार

काठमाडौं – सेयर बजार आज पनि घटेको छ । सेयर बजार परिसूचक नेप्से आज १० दशमलव १० अङ्कले घटेर १ हजार ८ सय ३७ दशमलव ७१ विन्दुमा झरेको छ ।

आज जीवन बीमाबाहेक सबै समूहको सेयर घटेको छ । आज उत्पादन तथा प्रशोधन, होटल तथा पर्यटन, निर्जीवन बीमा, व्यापार र माइक्रोफाइनान्स समूहको सेयर उच्च अङ्कले ओरालो लागेको छ ।

आज सबैभन्दा धेरै विशाल बजार कम्पनीको सेयर साढे ९ प्रतिशतले घटेको छ । समग्रमा बजार घटेको दिन सिङ्गटी हाइड्रो इनर्जीको सेयर १० प्रतिशतले बढेको छ ।

आज बजार घटे पनि कारोबार रकम बढेको छ । हिजो सोमवार १ अर्ब १९ करोड रुपैयाँको सेयर कारोबार भएकोमा आज ४६ लाख ९८ हजार कित्ता सेयर १ अर्ब ५४ करोड रुपैयाँमा कारोबार भएको छ । सबैभन्दा धेरै माउन्टेन इनर्जी नेपालको ३६ करोड २९ लाख रुपैयाँको सेयर किनबेच भएको छ ।