एनसेलको सेयर बिक्रीका विषयमा सरकारलाई जानकारी छैनः अर्थमन्त्री

काठमाडौं– अर्थमन्त्री डा प्रकाशशरण महतले एनसेलको सेयर बिक्रीका विषयमा अहिलेसम्म सरकारलाई जानकारी नभएको बताएका छन् । चितवनमा आज पत्रकारसँग कुराकानी गर्दै उनले आधिकारिकरूपमा सरकारलाई जानकारी नभएको जनाउँदै यसले पार्ने प्रभावका विषयमा टेलिकमका पदाधिकारसँग बुझ्दै गरेको जानकारी दिए ।

उनले भने, ‘हामी सूचना लिइरहेका छौं । यसको नियमन गर्ने निकाय टेलिकम हो । यो ठूलो किनबेच गर्दा अनुमति लिनुपर्ने व्यवस्था छ ।’

यसैगरी उनले देशको अर्थतन्त्र सुधारको गतिमा रहेको बताए । उनले भने, ‘नेपालमा आउने विदेशी पर्यटकको सङ्ख्या र विप्रेषण आप्रवाह ‘रेमिट्यान्स’ बढेको छ । समस्यामा परेका व्यवसायीको समस्या समाधान हुन्छ । अर्थतन्त्र विस्तारै लयमा फर्कन्छ । समग्रमा विदेशी रेमिट्यान्स ३० प्रतिशतले बढेको छ । पर्यटकको चाप बढ्दा पर्यटन व्यवसायी उत्साहित भएका छन् ।’

उनले अर्थतन्त्रमा सुधार आउन अझै केही समय लाग्ने बताए ।