राति जहाजबाट उपत्यका हेर्दा जुन सहर उज्यालो देखिन्छ, त्यो सहर ललितपुर हुनेछः चिरीबाबु महर्जन

काठमाडौं– ललितपुर महानगरपालिकाका मेयर चिरीबाबु महर्जनले रातको समयमा जहाजमा चढेर काठमाडौं उपत्यका हेर्दा उज्यालो देखिने सहर ललितपुर हुने बताएका छन् ।

बिहीवार बेलुकी ललितपुर महानगर क्षेत्रभित्र दोस्रो चरणमा जडान गरिएको स्मार्ट सडक बत्ती उद्घाटन कार्यक्रममा मेयर महर्जनले भने, ‘रात्रिकालीन अवस्थामा जहाजमा चढेर काठमाडौं उपत्यकामा उज्यालो देख्नुभयो भने त्यो ललितपुर महानगरपालिका हो । जुन सहर उज्यालो हुन्छ, त्यो ललितपुर महानगर हुनेछ ।’

ललितपुरमा बिहीवार एकै पटक १४ सय वटा स्मार्ट सडक बत्तीको उद्घाटन भएको थियो । दोस्रो चरणअन्तर्गत ललितपुरको भैँसे, खोकना, बुङ्गमती, धापाखेल, सुनाकोठी र हरिसिद्धीमा स्मार्ट बत्ती जडान भएको हो । महानगरले यसअघि पहिलो चरणमा कुपण्डोल, जावलाखेल, लगनखेल, सातदोबाटो, एकान्तकुना, मङ्गलबजार, पाटन ढोका क्षेत्रमा छ सय ६९ वटा स्मार्ट बत्ती जडान गरेको थियो ।

मेयर महर्जनले रातको समयमा हुने दुर्घटना न्यूनीकरणका लागि कुसुन्ती र धोबीघाट क्षेत्रमा बत्ती बाल्न १० दिनभित्र टेन्डर आह्वान गर्ने बताए ।

मेयर महर्जनले सडकमा स्मार्ट बत्ती बाल्नका लागि महानगरले यस वर्ष तीन करोड रुपैयाँ बजेट विनियोजन गरेको र एक करोड २० लाख रुपैयाँ नेपाल विद्युत् प्राधिकरणको सहयोग हुँदा चार करोड २० करोड रुपैयाँ पुगेको बताए ।