सरकार चलाउन नसके सत्तारूढ गठबन्धनले सत्ता छोड्नुपर्छः ओली

काठमाडौं– प्रमुख प्रतिपक्ष दल नेकपा (एमाले) का अध्यक्ष केपी शर्मा ओलीले सत्तारूढ गठबन्धनले सरकार छोड्नुपर्ने बताएका छन् । देशलाई प्रतिगमनतर्फ जानका लागि अनुकूल वातावरण बनाएकाले सत्तारूढ गठबन्धनले सरकार छोडनुपर्ने ओलीको जिकिर थियो ।

आज पार्टी मुख्यालय च्यासलमा आयोजित केन्द्रीय कमिटी बैठकमा अध्यक्ष ओलीले सरकारले प्रतिगामी शक्तिहरूलाई हौसला प्रदान गर्ने नालायकीपन देखाइरहेको उल्लेख गर्दै आफ्नो पार्टीलाई त्यस्ता खालका गतिविधि स्वीकार्य नहुने चेतावनी दिए ।

उनले वर्तमान सरकारले देशको अर्थतन्त्रलाई सकारात्मक बाटोमा फर्काउने सम्भावना नरहेको दाबी पनि गरे ।

अध्यक्ष ओलीले सत्तारूढ गठबन्धनको सत्ता स्वार्थका कारण देशको स्वाधीनता सबैभन्दा अपहेलित, अपमानित र तिरस्कृत हुने पुगेको दाबी गरे । वर्तमान सरकारले देशको असंलग्नता र तटस्थतासम्बन्धी परराष्ट्र नीति पनि धरापमा पारेको उनको आरोप थियो ।

ओलीले वामपन्थी एकतामा भन्दा एमालेलाई सुदृढ राष्ट्रिय शक्ति बनाउने काममा केन्द्रित हुन पार्टीका नेता, कार्यकर्तालाई सचेत पनि गराएका छन् ।