चिकित्सकको लापरबाहीले शिशुको मृत्यु भएको भन्दै सेती प्रादेशिक अस्पताल घेराउ

काठमाडौं– सुदूरपश्चिम प्रदेशको अस्थाई राजधानी धनगढीमा रहेको सेती प्रादेशिक अस्पतालमा नवजात शिशुको मृत्यु भएपछि आफन्तहरुले विरोध गरेका छन् ।

धनगढी उपमहानगरपालिका–९ बंग्राकटानकी २४ वर्षीया तारा विकले मंगलबार राति शल्यक्रियामार्फत शिशु जन्माएकी थिइन् ।

जन्माएको शिशुको मृत्यु भएपछि चिकित्सकले लापरबाही गरेको भन्दै आफन्तले अस्पताल घेराउ गरेका छन् । उनीहरूले पीडित परिवारलाई क्षतिपूर्ति दिनुपर्ने तथा शल्यक्रियामा संलग्न चिकित्सकलाई कारबाही गर्नू पर्ने माग गरेका छन् ।

सुत्केरीका आफन्त सुरेश सुनारले चिकित्सकको लापरबाहीका कारण शिशुको मृत्यु भएको बताउदै सम्बन्धित चिकित्सकलाई कारबाही गरिनुपर्ने तथा पीडित परिवारलाई क्षतिपूर्ति दिनुपर्ने बताएका छन् ।

सुत्केरी ब्यथा लागेपछि मंगलबार बिहान ७ बजे बिकलाई प्रादेशिक अस्पताल भर्ना गरिएको थियो ।