पप्पु कन्स्ट्रक्शनका पूर्वसञ्चालक रौनियार एमालेमा प्रवेश

काठमाडौं– समयमै काम नसकेर पटक–पटक विवादमा आएको ठेकेदार कम्पनी पप्पु कन्स्ट्रक्शनका पूर्वसञ्चालक हरिनारायण रौनियार नेकपा एमालेमा प्रवेश गरेका छन् ।

जनता समाजवादी पार्टी (जसपा) का पूर्वसांसद तथा निर्माण व्यवसायी हरिनारायण रौनियारलाई पर्साको पोखरियामा भएको एक कार्यक्रममा पार्टी अध्यक्ष केपी शर्मा ओलीले पार्टीमा प्रवेश गराएका हुन् । रौनियारसँगै अरू व्यक्ति पनि एमालेमा प्रवेश गरेका छन् ।

रौनियार २०७४ को चुनावमा पर्सा क्षेत्र नम्बर ३ बाट सांसद निर्वाचित भएका थिए । रौनियारले जसपा अध्यक्ष यादवले एकलौटी गरेपछि एमालेमा प्रवेश गरेको बताए ।

पप्पु कन्स्ट्रक्शनले ठाउँठाउँमा विकास निर्माणका काम अलपत्र पारेपछि सरकारले कम्पनीलाई कालोसूचीमा राखेको छ ।