गाजामा पश्चिमको मौनताले अराजकतालाई ‘ग्रीन सिग्नल’ दियोः टर्की

एजेन्सी– टर्कीका विदेशमन्त्री हकान फिदानले गाजामा भएको आक्रमणमा पश्चिमाहरूको मौनताले अराजकतालाई अनुमोदन गरेको सङ्केत गरेको बताएका छन् ।

गाजामा इजरायलको आक्रमणमा पश्चिमको मौनता विश्वभरका अन्य अराजक गतिविधिहरूलाई ’ग्रीन सिग्नल’ दिनु बराबर रहेको बिहीवार आयोजित पत्रकार सम्मेलनमा विदेशमन्त्री फिदानले बताएका हुन् । प्रतिरोधका लागि मस्जिद, अस्पताल र विद्यालयहरूमा बम विष्फोट गरिन्छ भने आफूहरू मौन बस्न नसक्ने उनको चेतावनी थियो ।

टर्कीको विदेश मन्त्रालयले बुधवार इजरायली अधिकारीहरूको आलोचना गर्दै टर्कीका राष्ट्रपति रेसेप तैयप एर्डोगानविरुद्ध लगाएका आरोप निराधार भएको र गाजाका नागरिकमाथि हमला गरिरहँदा उनीहरूलाई कानुनको बारेमा कुरा गर्ने अधिकार नरहेको बताएको थियो ।

इजरायलले अक्टोबर ७ मा दक्षिणी इजरायलमा प्यालेस्टिनी विद्रोही समूह हमासको हमलाको विरुद्धमा बदला लिन गाजामा पूर्णरूपमा आक्रमण गरिरहेको छ ।

यस क्रममा हमासले इजरायलमा झन्डै एक हजार दुई सय जनाको हत्या गरेका थिए र दुई सय जनाभन्दा बढीलाई बन्धक बनाएका थिए ।