ललितपुर सातदोबाटोको महालक्ष्मी विश्वकर्मा ट्रेडर्स पेट्रोल पम्प सिल

काठमाडौं– ललितपुरको सातदोबाटोमा रहेको महालक्ष्मी विश्वकर्मा ट्रेडर्स पेट्रोल पम्प सिल भएको छ । ग्राहकलाई पेट्रोल बेच्दा तोकिएको परिमाणभन्दा कम दिएको आरोपमा उक्त पेट्रोल पम्प सिल गरिएको हो ।

आज बिहान प्रधानमन्त्रीको सचिवालय तथा प्रधानमन्त्री कार्यालय, गुणस्तर एवं नापतौल विभाग, नेपाल आयल निगम, राष्ट्रिय सतर्कता केन्द्र, वाणिज्य विभाग, वाणिज्य आपूर्ती तथा उपभोक्ता हित संरक्षण विभागले संयुक्त रुपमा गरेको अनुगमनका क्रममा उपभोक्तालाई तोकिएभन्दा कम परिमाण पेट्रोल बिक्री गरेको पाइएपछि सिल गरिएको हो ।

यसअघि बिहीबार अनुगमन टोलीले काठमाडौंको शान्तिनगरस्थित हरिसिद्धी पेट्रोल पम्प सिल गरेको थियो ।

सरकारले काठमाडौं उपत्यकामा अहिले पेट्रोल पम्प अनुगमन अभियान नै चलाएको छ । मिटर बिगारेर मूल्यभन्दा कम पेट्रोल दिने गरेको पाइएपछि पेट्रोल पम्प सिल गर्ने गरिएको अनुगमन टोलीले जनाएको छ ।