‘दुई कदम’ को टिजर सार्वजनिक

काठमाडौं – उदय सुब्बाद्वारा निर्देशित नेपाली चलचित्र ‘दुई कदम’ को टिजर सार्वजनिक गरिएको छ । सामाजिक विषयवस्तुमा केन्द्रित रही निर्माण गरिएको चलचित्रको टिजरमा मुख्य कलाकारलाई देखाइएको छ । दयाराम घिमिरेले कथा तथा पटकथा लेखेको यो चलचित्र अजम्बरी फिल्म्स प्रालिको ब्यानरमा निर्माण गरिएको हो ।

चलचित्र ‘दुई कदम’ निर्देशक सुब्बा, विल्सनविक्रम राई, प्रेम सुब्बा, गौरव पहारी, सुनिल थापा, कविता आले, बुद्धि तामाङ, विमला लिम्बू, जीवन लिम्बू, चन्दा दाहाल, अर्जुन गुरुङ लगायतका कलाकारको अभिनय छ । साथै नवकलाकारमा इयोन लिम्बु र सिमोन गिरीको अभिनय छ । चलचित्रका गीतमा संगीतकार विकाश चौधरीले संगीत भरेका छन् ।

मुस्ताङ, धरान, इलाम, तेह्रथुम लगायतका स्थानमा खिचिएको यस चलचित्रको छायांकन विक्रम डिसीले गरेका छन् । यस्तै, चलचित्रमा प्रविण ढकालको सम्पादन, राजु किरातीको द्वन्द्व, राम्जी लामिछानेको कोरियोग्राफी, तारादेवी लिम्बु निमार्ता रहेको छ ।

चलचित्रमा रहेका गीतमा समेत सामाजिक विषयवस्तु र समुदायको सांस्कृतिक पहिचानलाई चित्रण गरिएको छ । यसअघि करिब डेढ दर्जन चलचित्र निर्माण गरी नेपाली सिनेजगतमा अलग पहिचान बनाएका निर्देशक सुब्बाले सामाजिक यथार्थमा आधारित चलचित्र बनाउँदै आएका छन् । निर्देशक सुब्बाका अनुसार चलचित्रमा मानिसको पहिचान र सामाजिक यथार्थलाई उठान गरिएको छ ।

उनले सामाजिक सांस्कृतिक विषयलाई कलात्मक ढंगले चित्रण गर्दै समाजमा विद्यमान विकृति विसंगतिविरुद्ध चलचित्रले आवाज उठाउने कोसिस गरेको बताए । निर्देशक सुब्बाले चलचित्र आगामी मंसिर २९ गतेदेखि देशव्यापी प्रदर्शनमा आउने तयारीमा रहेको जानकारी दिए ।