लुटेको एक लाख रकमसहित दुई युवक पक्राउ

काठमाडौं– दाङको तुलसीपुरबाट लुटेको एक लाख रकमसहित दुई जना युवक पक्राउ परेका छन् ।

तुलसीपुर उपमहानगरपालिका– ५ सम्झना टोलका २१ वर्षीय आयुष विक र सोही ठाउँका १८ वर्षीय सुनिल मगर आज दिउँसो पक्राउ परेका हुन् ।

आज दिउँसो तुलसीपुर–८ का दिनेश वलीले बैंकबाट एक लाख रुपैयाँ निकालेको देखेपछि उनीहरूले पिछा गरेका थिए ।

उनीहरूले वलीको मोबाइल र एक लाख नगद पनि लुटेर भागेको इलाका प्रहरी कार्यालय तुलसीपुरका डिएसपी ठाकुर पोखरेलले जानकारी दिए ।

लुटपाट भएको खबरपछि इलाका प्रहरी कार्यालय तुलसीपुर, नयाँ बसपार्क र बेलुवा प्रहरी चौकीबाट प्रहरी खटिएको थियो ।

बसपार्कका प्रहरी इञ्चार्ज प्रहरी सहायक निरीक्षक सञ्तोष आचार्यका अनुसार लुटपाट पछि उनीहरू भागेका थिए । पछि प्रहरीले उनीहरूलाई तुलसीपुर–१० राइखल्यान क्षेत्रबाट पक्राउ गरेको हो ।

प्रहरीले घटनाको थप अनुसन्धान अघि बढाएको छ ।