अफगानिस्तान शक्तिशाली भूकम्प: मृतकको सङ्ख्या २ हजार पुग्यो

काठमाडौं– अफगानिस्तानमा शनिबार राति ६.३ रेक्टरको शक्तिशाली भूकम्प गएको छ ।

स्थानीय समयअनुसार शनिबार राति ११ बजे पश्चिमी सहर हेरातबाट ४० किलोमिटर टाढा केन्द्रबिन्दु बनाएर भूकम्प गएको थियो । त्यसपछि पनि दर्जनौं पराकम्पन गएका थिए ।

एक जना तालिबानी प्रवक्तालाई उद्धृत गर्दै समाचार संस्था एपीले आइतबार बिहानसम्म मृतकको संख्या २ हजार पुगेको जनाएको छ ।

अहिले पनि कैयौं मानिसहरू भत्किएका घरमा च्यापिएका छन् । उनीहरूको उद्धारको प्रयास भइरहेको छ ।

भूकम्पमा परी मृत्यु भएकाहरूको शव संकलन गरी अस्पताल, सैनिक शिविरमा राखिएको हेरातको स्वास्थ्य विभागका अधिकारीले बताएका छन् ।