चलचित्र ‘परदेशी २’ को ट्रेलर सार्वजनिक

काठमाडौं– दसैंको छेको पारेर असोज २६ गतेबाट सार्वजनिक प्रदर्शनको तयारीमा रहेको फिल्म ‘परदेशी २’को ट्रेलर सार्वजनिक भएको छ ।

ट्रेलरमा अध्ययनका लागि युवाको विदेश यात्रा र त्यसले सिर्जना गर्ने पारिवारिक एवं सामाजिक संवेदना दर्साइएको छ । प्रेम, बिछोड, उमंग, द्वन्द्व सबै पक्ष मिृत ट्रेलरमा समेटिएको छ ।

नारायण रायमाझी निर्देशित फिल्ममा प्रकाश सपूत, केकी अधिकारी, वर्षा शिवाकोटीसँगै अभिनेताद्धय प्रशान्त तामाङ र दीलिप रायमाझीको अभिनय छ । ट्रेलरमा पनि सबै कलाकार अटाएका छन् ।

गायनमा स्थापित सपूतको यो डेब्यु फिल्म हो । दसैंको परिवेशलाई समेत चलचित्रले झल्काउने छ ।

यसअघि ‘गोर्खा पल्टन’ र ‘परदेशी’ जस्ता सुपरहिट फिल्म दिएका निर्देशक रायमाझीको ‘परदेशी २’ तेस्रो फिल्म हो ।