ट्यूसन पढ्न हिँडेका दुई बिद्यार्थीको ट्रकको ठक्करबाट मृत्यु : मलेखुमा राजमार्ग ठप्प

धादिङ – ट्यूसन पढ्न विद्यालय हिँडेका सिद्धलेक ६ परेवाटारका दुईजना विद्यार्थीको मलेखुमा ट्रकको ठक्करबाट मृत्यु भएको छ ।

बुधवार, पृथ्वी राजमार्ग अन्र्तगत धादिङको गजुरी गाउँपालिका – २ मलेखुस्थित मजुवामा ट्रकको ठक्करबाट उनिहरुको मृत्यु भएको हो । मृत्यु हुनेहरुमा सिद्धलेक गाउँपालिका – ६ परेवाटारका निर्मल श्रेष्ठ र सञ्जीव श्रेष्ठ रहेका छन् । उनिहरुको काठमाडौंबाट चितवनतर्फ जाँदै गरेको प्रदेश ०२ – ००१ ख ६४१३  नं. को ट्रकको ठक्करबाट घटनास्थलमै ज्यान गएको जिल्ला प्रहरी कार्यालयका प्रहरी नायब उपरीक्षक सन्तुलालप्रसाद जैसवारले जानकारी दिए ।

मृतक दुवैजना बागेश्वरी माध्यमिक विद्यालय मलेखुमा कक्षा ८ मा अध्यनरत थिए । घटनापछि स्थानीयले क्षतिपूर्तिको माग गर्दै पृथ्वीराजमार्गको मलेखुमा यातायात ठप्प पारेका छन् ।

त्यस्तै प्रहरीले ट्रक चालक रौतहटको चन्द्रपुर नगरपालिका – २ का ४१ वर्षीय अशोक बम्जनलाई नियन्त्रण लिएको छ ।