सुन तस्करीको स्वतन्त्र, निष्पक्ष छानबिन गरौं भन्दा गृहमन्त्री आत्तिएः ओली

काठमाडौं– प्रमुख प्रतिपक्षी दल नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले गृहमन्त्री नारायणकाजी श्रेष्ठ सुन तस्करीको स्वतन्त्र, निष्पक्ष छानबिन गरौं भन्दा आत्तिएको बताएका छन् ।

प्रतिनिधि सभाको आजको बैठकमा, सुशासनलगायतका विषयमा गृहमन्त्री श्रेष्ठको आलोचना गर्दै सुन तस्करीमा संलग्नहरूलाई पक्राउ नगरेको आरोप लगाएका छन् ।

ओलीले गृहमन्त्री श्रेष्ठ सुन तस्करीबारे छानबिन गर्न डराएको बताए । ‘साढे ९ किलो सुन भेपमा पक्राउ पर्छ तपाईं ढाकछोप गर्न लाग्नुहुन्छ । १ सय किलो सुन बरामद हुन्छ,’ ओलीले भने, ‘छानबिन गर्दा के बिग्रिन्थ्यो ? महासय तपाईं किन आत्तिनुभयो स्वतन्त्र निष्पक्ष छानबिनसँग ?’

सुशासन अभियान नभएर सरकारको काम भएको बताउँदै ओलीले सरकारले सुशासनको अभियान चलाएको भन्न नहुने बताए ।

प्रतिपक्षमाथि सुशासनको अभियान रोक्न लागेको भनेर गृहमन्त्रीले गलत बोलेको ओलीले बताए ।

एक क्विन्टल सुन तस्करीमा संलग्न व्यक्तिलाई छाडिएको तर सांसद सुनिल शर्मालाई शैक्षिक प्रमाण पत्र मुद्दामा हत्कडी लगाइएको ओलीको भनाइ छ ।