बत्ती निभाउने क्रममा करेन्ट लागेर एकजनाको मृत्यु

काठमाडौं– विद्युत्को खम्बामा बल्दै गरेको बत्ती निभाउने क्रममा करेन्ट लागेर पश्चिम नवलपरासीमा एकजनाको मृत्यु भएको छ ।

आज बिहान ६ः०० बजेको समयमा रामग्राम नगरपालिका–७ बस्ने जयप्रकाश यादव सोही वडाको उजैनीमा रहेको खम्बाको बत्ती निभाउन गएका थिए । सोही क्रममा उनलाई करेन्ट लागेको जिल्ला प्रहरी कार्यालयका सूचना अधिकारी एवं प्रहरी नायब उपरीक्षक रेशम बोहराले बताए ।

करेन्ट लागेका यादवलाई उपचारका लागि जिल्लाको पृथ्वीचन्द्र अस्पतालमा लगिए पनि चिकित्सकले मृत घोषणा गरेका थिए ।