अमेरिकाद्वारा युक्रेनलाई लामो दूरीका क्षेप्यास्त्र दिने प्रक्रिया सुरु

एजेन्सी– अमेरिकी राष्ट्रपति जो बाइडेनले युक्रेनलाई लामो दूरीका क्षेप्यास्त्र उपलब्ध गराउने प्रक्रिया शुरु गरेका छन् ।

युक्रेनले रुसविरुद्ध गरिरहेको प्रतिक्रियात्मक कारबाहीमा सहयोग पुग्ने गरी अमेरिकाले लामो दूरीका क्षेप्यास्त्र उपलब्ध गराउन लागेको बीबीसीले जनाएको हो ।

राष्ट्रपति बाइडेनले आफ्ना युक्रेनी समकक्षी भ्लोदिमिर जेलेन्स्कीलाई थोरै सङ्ख्यामा आर्मी ट्याक्टिकल मिसाइल प्रणाली अन्तर्गतका मिसाइलहरू उपलब्ध गराउने बताएको अमेरिकी अधिकारीहरुलाई उद्धृत गर्दै बीबीसीले जनाएको छ । यी मिसाइलले तीन सय किलोमिटर परसम्म प्रहार गर्न सक्ने अमेरिकी अधिकारीहरुले बताएका छन् ।

हिजो युक्रेनले क्राइमियामा रुसको ब्ल्याक सी फ्लिटको मुख्यालयमा क्षेप्यास्त्र प्रहार गरेको थियो ।

बीबीसीका अनुसार सेभास्टोपोल बन्दरगाहमा भएको आक्रमणमा बेलायत र फ्रान्सले आपूर्ति गर्ने स्टर्म छायाँ मिसाइलहरू प्रयोग गरिएको थियो । यस्ता क्षेप्यास्त्रले एक सय ५० माइलभन्दा टाढासम्म प्रहार गर्न सक्छन् ।