तत्काल पठनपाठन सूचारु गर्न काभ्रेका स्थानीय तहको निर्देशन

काठमाडौं– काभ्रेका स्थानीय तहले विद्यालयको पठनपाठन सञ्चालन गर्न निर्देशन दिएका छन् । आज धुलिखेलमा भएको स्थानीय तहका प्रमुख तथा उपप्रमुखहरूको संयुक्त बैठकले तत्काल विद्यालयको पठनपाठन सूचारु गर्न निर्देशन दिएका हुन् ।

अनिश्चितकालिन विद्यालय बन्द गरेर शिक्षकहरू आन्दोलनमा रहँदा विद्यार्थीहरूको अधिकार हनन् भएको ठहर गर्दै स्थानीय तहका प्रमुख तथा उपप्रमुखले उक्त निणर्यसहित निर्देशन दिएका हुन् ।

नमोबुद्ध नगरपालिकाका प्रमुख कुन्साङ लामाको संयोजकत्वमा बसेको बैठकले एक विज्ञप्ति जारी गर्दै बन्द रहेको विद्यालय तत्काल सूचारु गर्न निर्देशन दिएको हो ।

विद्यालय बन्दको कारण बालबालिकाको विद्यालय जाने अधिकारबाट बञ्चित हुन पुगी शिक्षामा ठूलो असर भएकाले सबै सरोकारवालाहरू संवेदनशील र गम्भीर भई तत्काल विद्यालय सञ्चालन गर्नुपर्ने निष्कर्ष स्थानीय सरकारहरूका नेतृत्वहरूले निकालेका छन् ।

यदि तत्काल विद्यालय सञ्चालन नगरेमा स्थानीय सरकारले संविधानमा रहेका संवैधानिक व्यवस्था अनुसार पठनपाठन सुचारु गर्न बाध्य हुने चेतावनीसमेत दिएका छन् ।

उक्त बैठकले नेपाल सरकारले संसदमा छलफलको लागि पेश गरेको शिक्षा विधेयक २०८० तत्काल फिर्ता गर्न पनि आग्रह गरेका छन् ।