हेटौँडा स्वास्थ्यकर्मी कुटपिट घटना: ७८ डाक्टरद्वारा सामूहिक राजीनामा, आकस्मिकबाहेकका सबै सेवा ठप्प

काठमाडौं– दुई जना डाक्टरमाथि भएको कुटपिटको विरोधमा हेटौँडाको सञ्चो अस्पताल, हेटौँडा अस्पतालसहित मकवानपुरका निजी र सरकारी स्वास्थ्य संस्थामा आकस्मिक बाहेकका सबै सेवा ठप्प भएका छन् ।

डाक्टरलाई कुटपिट गर्ने सबैलाई पक्राउ नगरेसम्म आकस्मिक बाहेकका सबै सेवा ठप्प पारिने हेटौंडा अस्पतालका डाक्टर हरिबहादुर खड्काले बताए । हेटौँडा अस्पतालमा कार्यरत ७८ जना डाक्टरहरुले सामूहिक रुपमा राजीनामा दिएको डाक्टर खड्काले बताए ।

हेटौँडा अस्पतालमा मात्र हरेक दिन १५ सय जनाभन्दा धेरै बिरामीले ओपीडीबाट सेवा लिँदै आएका छन् । त्यहाँका निजी अस्पतालमा पनि बिरामीको त्यति नै चाप हुने गरेको छ । ओपीडी सेवा बन्द भएपछि बिरामीहरु मर्कामा परेका छन् ।

बिरामीको उपचार गरिरहेका बेला हाइ डिपेन्डेन्सी युनिट (एचडीयू) मै डाक्टरमाथि भएको आक्रमणले असुरक्षा बढेको भन्दै मकवानपुरका स्वास्थ्यकर्मीले आन्दोलन थालेका हुन् । बुधबार बिहान हेटौँडा–१ को सञ्चो अस्पतालमा डाक्टर प्रशान्त बिडारी र डाक्टर विकास थापामाथि कुटपिट भएको थियो ।

डेङ्गीका कारण एक महिनाअघि ज्यान गुमाएका हेटौँडा–१२ का राजेश प्रधानका आफन्तले अस्पतालभित्र प्रवेश गरी डाक्टरमाथि कुटपिट गरेका हुन् ।
डाक्टरमाथि कुटपिट गर्ने चार जनालाई भने प्रहरीले पक्राउ गरेको छ ।