‘पुष्पा २’ र ‘सिंघम अगेन’ को भिडन्त

मुम्बई – दक्षिण भारतीय अभिनेता अल्लु अर्जुन अभिनीत चलचित्र ‘पुष्पा २’ को प्रदर्शन मिति तय गरिएको छ । अभिनेताले सामाजिक सञ्जालमा चलचित्रको पोस्टर सेयर गर्दै सन् २०२४ को अगस्ट १५ अर्थात् २०८१ सालको साउन ३१ गते चलचित्र प्रदर्शनमा आउने जनाएका छन् । यस्तै, भारतीय स्वतन्त्रता दिवससमेत रहेको उक्त मितिमा बलिउड अभिनेता अजय देवगण अभिनीत प्रतीक्षित चलचित्र ‘सिंघम अगेन’ पनि प्रदर्शनमा आउने तयारीमा छ ।

भारतीय बक्स अफिसमा यसलाई अल्लु अर्जुन भर्सेस अजय देवगण, निर्देशक सुकुमार भर्सेस रोहित शेट्टीको प्रतिस्पर्धाको रुपमा हेरिएको छ । ‘पुष्पा २’ सन् २०२१ मा प्रदर्शनमा आएको ‘पुष्पा ः द राइज’ को सिक्वेल हो । यो चलचित्रले भारतको राष्ट्रिय अवार्डमा सर्वश्रेष्ठ अभिनेता र संगीत निर्देशक विधा जित्न सफल भएको थियो । चलचित्रमा एसपी भंवर सिंह शेखावतको भूमिकामा फहद फासिल र अभिनेता रश्मिका मन्दाना मोलेती श्रीवल्लीको भूमिकामा रहने जनाइएको छ ।