सुन तस्करी प्रकरणमा विध ल्याबका सञ्चालक भण्डारीसँग सीआईबीले लियो बयान

काठमाडौं– ६० किलो सुन तस्करी प्रकरणमा नेपाल प्रहरीको केन्द्रीय अनुसन्धान ब्यूरो (सीआईबी) ले विध ल्याबका सञ्चालक भीमकान्त भण्डारीसँग बयान लिएको छ ।

सुन तस्करी प्रकरणमा पक्राउ परेका चिनियाँ मूलका बेल्जियन नागरिक दावा छिरिङसँग पटक पटक कुराकानी भएको देखिएपछि सीआईबीले भण्डारीसँग बयान लिएको हो ।

प्रहरीले बोलाएपछि भण्डारी आज बिहान सीआईबी गएका थिए । भण्डारीसँग बयान लिएर आवश्यक परेमा उपस्थित हुने कागज गराएर पठाइएको सिआईबी स्रोतले जानकारी दिएको छ ।

भण्डारीको यसअघि विद्युतीय चुरोट (भेप) मा लुकाएर भएको सुन तस्करी प्रकरणमा जोडिएका चिनियाँ नागरिकसँग पनि पटक पटक कुराकानी भएको प्रमाण प्रहरीले फेला पारेको थियो ।